Повеќе села во струшко се отсечени поради обилни врнежи од снег. Локалните патни правци кон Горна Белица, Присовјани, Збажди, Ржаново, Локов, Селци и Буринец не се проодни за сообраќај. Само за теренски возила проодни се патните правци кон селата Дренок, Модрич, Јабланица, Прискупштина, Нерези и Брезово, соопшти Центарот за управување со кризи.

Сообраќајот на патниот правец Ресен – Битола, кој беше оштетен од свлечиште кај местото Макази се уште е затворен за сообраќај и тој се одвива по стариот пат Битола – Ресен. Регионалниот пат Струга - Дебар и од Дебар кон Маврово кој беше во прекин, сега е прооден за сите моторни возила. На патниот правец Дебар - Маврово кај селото Рајчица, наспроти селото Долно Косоврасти, кај Ростушки мост и наспроти селото Јанче има активни свлечишта од земја и камења, кои претставуваат потенцијална опасност за сите кои патуваат на овој патен правец.