На средбата на премиерот Зоран Заев, и претседателот на политичката партија Алтернатива, Африм Гаши, кои со своите тимови имаа работна средба во Клубот на пратеници е постигната начелна согласност за програмскиот дел од можната идна соработка изразена преку политичко и извршно учество на Алтернатива во Владата.
Како што соопшти владината прес-служба, соговорниците се согласни дека реформскиот и европскиот курс за кои се определени граѓаните и државата мора да продолжат и дека во овие моменти најважна е стабилноста на институциите на државата кои им служат на граѓаните. На тој начин, се додава во соопштението, ќе се обезбедат и најдобри решенија за најголемите актуелни предизвици како што се Ковид-19 пандемијата и глобалната енергетска криза.

Започнаа разговорите за преземање и споделување одговорности во интерес на граѓаните и државата, при што се разменија мислења околу можните кадровски решенија кои треба да ги преземат потенцијалните обврски и одговорности, односно за соодветните позиции, министри, заменици министри и други раководни лица во рамки на централната власт. Во деновите што следат, ќе продолжат консултации во партиите, по што ќе следи и нова работна средба помеѓу премиерот Заев и претседателот на Алтернатива, Гаши со нивните тимови, стои во соопштението на владината прес-служба.

Пред почетокот на средбата премиерот Заев не сакаше да коментира ништо.  Претседателот на Алтернатива Африм Гаши, пак, пред одржувањето на средбата посочи дека определба на партиијата е да се даде шанса за излез од политичката криза, како и од енергетската и здравствената криза и како што рече, да и се помогне на државата да не ја изгуби историската шанса да започне преговори за членство во ЕУ. Одговарајќи на новинарско прашање колку министерски места очекува неговата партија, претседателот на Алтернатива посочи дека за партијата тоа никогаш не било од суштинско значење и оти за неа е важно да се разговара за политичките критериуми.Тој вели дека партијата останува на ставот дека во интерес на сите граѓани е да нема брзи избори.

Во врска со тоа дали за Алтернатива е прифатливо нов мандатар односно премиер да биде Димитар Ковачевски од СДСМ, кој во моментов е заменик-министер за финансии, Гаши кусо рече дека за нив е битно концептуално да се договори концептот, а не тие да одлучуваат за кадровски решенија на другите политички партии.

Ние преговараме со СДСМ и со другите партнери и многу ни е битно да се договориме концептуално како ќе продолжиме понатаму. Какви одлуки ќе донесат СДСМ и другите партии мислам дека е неодговорно и несовесно ние да поставуваме такво прашање. Не е одговорно ние да бараме од друга партија кој ќе биде мандатар или премиер. Мислам дека таа работа е на СДСМ, таа е најголема партија и тие треба да одлучат кој е нивен претседател или мандатар, рече Гаши.

Ова е втора средба на Заев и Гаши, откако на 19-ти месецов тие разговараа за условите и улогата на Алтерантива во новото парламентарно мнозинство, а конечната одлука беше оставено да ја донесат партиските органи.

Централното претседателство на Алтернатива во петокот го овласти Гаши да почне разговори со сите политички актери, со премиерот и со евентуалниот нов мандатар за да се види каков е нивниот концепт за излез од политичката криза, додека на седницата на Централниот одбор на СДСМ, што се одржа исто така во петокот, беше констатирана оставката на Заев од лидерската позиција во партијата, но му беше даден легитимитет да ги води преговорите за парламентарно мнозинство.

 

OhridNews