Page not found - OhridNews

Лазаревска: СДСМ основа Медицински факултет во Битола, усвоени се законските измени

Со усвоениот Закон предложен од пратениците на СДСМ основаме Медицински факултет во Битола кој ќе биде во состав на Универзитетот „Св. Климент Охридски” – Битола, а ќе ги има отсеците за општа медицина, стоматологија, фармација и Висока медицинска школа, рече на денешната прес конференција пратеничка на СДСМ, Жаклина Лазаревска.

Наставните бази на Факултетот ќе бидат Клиничката болница Битола, Специјалната болница за кардиолошки заболувања „Свети Стефан“ Охрид, Специјалната болница за ортопедија и трауматологија „Свети Еразмо“ Охрид, Специјалната болница за нефрологија Струга и болницата со проширена дејност во Прилеп. Обезбедуваме висок степен на образование и обука за студенти кои ке станат идни лекари, со потребни знаења и вештини. Со основањето на Медицинскиот факултет Битола ќе го утврди своето место како регионален образовен центар и ќе даде можност на средношколците од градот и околните населени места, да студираат во своето место, потенцираше Лазаревска.

Значително, вели, ќе допринесе во создавањето на нов стручен кадар, подобрување на здравствениот систем и одржување на високи стандарди за образованието, етиката и праксата во областа на медицината.

Ова ќе влијае на зголемување на квалитетот на здравствени услуги преку обучени и компетентни лекари за подобрување на здравјето на населението. Создаваме здравствен систем што не само што ќе ги обучува следните генерации на лекари туку и активно ќе придонесува кон напредокот и здравјето на општеството, додаде Лазаревска.

OhridNews

Охриѓани оддадоа почит на ликот и делото на охридскиот истражувач и археолог Гоце Жура

Oхриѓани денес имаа можност да се потсетат на Гоце Жура, основоположникот и втемелувач на теренските истражувања на пештерските цркви во Охридско-преспанскиот регион како и активен истражувач на постоечки и новооткриени сакрални објекти во Охрид. Со своето присуство на настанот што се одржа денес во спомен-куќата на Христо Узунов му оддадоа почит за непроценливиот придонес кон науката и афирмацијата на нашето културно-историско наследство и православната црковна историја.

Настанот по повод петгодишнината од упокојувањето на Гоце Жура беше во организација на д-р Гордана Ангеличин-Жура и Горан Митрески, историчар кустос, во соработка со НУ Завод за заштита на спомениците на културата и Музеј-Охрид. За ликот и делото на Гоце Жура говореа археологот Паско Кузман, историчарот на уметност Јорданка Матова, директорот на НУБ „Григор Прличев“ Охрид м-р Милчо Јованоски и проф. Д-р Климент Наумов, доцент при Факултетот за туризам и угостителство-Охрид.

Ќерката на Гоце Жура, д-р Гордана Ангеличин-Жура вели идејата била да се соберат сите охриѓани и да споменат за се што има Гоце Жура придонесено за Охрид, но и младите идни генерации да  бидат во тек, да го продолжат делото, не само негово, туку и на сите заслужни охриѓани во областа на науката, историјата, културата.

Сите го знаат како еден лик, научник, апасиониран човек за историското наследство, основоположник на истражувањата на пештерските цркви во Охридско-преспанскиот регион. Целиот свој живот го даде за науката и навистина со љубов го работеше тоа и многу сакаше наредните генерации да бидат свесни на кое тло чекорат, колку сме опркужени со црковна историја и колку е богато нашето културно-историско наследство.

Потенцираше дека како наследник на неговите авторски права стои на располаѓање на сите кои имаат идеи во насока на зачувувување на ликот и делото на Жура и се надева дека ова чествување ќе прерасне во традиција.

Археологот Паско Кузман во своето излаѓање се задржа накратко на живот на Жура, но најмногу на неговата стручна работа односно неговите стручни резултати изразени во книги.

Беше многу чуден во позитивна смисла. Имавме и јавни несогласувања, но никогаш не бевме непријатели, секогаш бевме пријатели. Охрид има силна и голема традиција со многу познати личности, охриѓани, историски и од сите профили. Се надевам и за Гоце Жура понатаму ќе се создаваат услови за паметење. Јас и дадов веќе предлог на неговата ќерка да направи собрани дела. Ако ги собере сите негови досега објавени трудови по медиумите и плус во книгите веќе има два три тома и на тој начин се продолжува паметењето за тие заслужни луѓе за Охрид.Тоа важи за сите, рече Кузман.

Историчарот на уметност Јорданка Матова се потсети на гимназиските денови со Жура, но и студенски денови посочувајќи дека со Жура биле првата генерација историчари на уметност.

Гоце беше еден прекрасен харизматичен човек што остави зад себе големи дела. Имам преубави спомени со него, теренски истражувања. Бевме многу поврзани, секогаш знаев што пишува, знаеше тој јас што пишувам. Си дававме еден на друг голема поддршка за работа. Ова е нашата истотија, култура и секогаш треба да даваме значење на вакви настани, затоа што оставаме дела зад нас. Гоце остави над 20 книги историја од 14, 15 до 20 век. Тој ги проучи пештерните цркви во Охрид и околината. Тоа е од одгромно значење, не само за Гоце, за сите ние што пишуваме и оставаме дела зад нас, потенцираше Матова.

Проф. Д-р Климент Наумов, доцент при Факултетот за туризам и угостителство-Охрид рече дека за него Гоце Жура претставал непресушна испирација и извор на вистина драгоцени информации и го насочил логички, трезвено и систематски да размислува. Потенцира дека бил од пресудно и суштинско значење во неговото градење како еден интелектуалец.

Гоце Ангеличин-Жура остави еден многу длабок печат на Охрид, на охриѓани, на Македонија, на целиот регион, пред се поради неговата љубов која ја имаше кон културното наследство, кон историјата на уметноста. Тој успеа да ги евидентира и ситематизира сите пештерни цркви во Охрид и охридско, на Преспанско Езеро, без разлика дали се наоѓале во Македонија, Албанија или Грција. Успеа да ја прескокне онаа фамозна бројка од 365 цркви во Охрид, легендата која сите љубиме да ја кажуваме и успеа да евидентира повеќе од 1500 цркви и свети места во Охрид и охридско. Ова е најмалку што сите можеме како еден последен збор да го дадеме за неговиот лик и дело, истакна Наумов.

Гоце Ангеличин Жура почина во 2019 година на 67 годишна возраст. Зад себе остави импресивна библиографија од 20 книги и над 60 научни трудови. Неговите истражувања резултираат со огромна фото документација, драгоцена за идните генерации и науката во целост. Ја заинтригира јавноста за вредностите на средновековната уметност преку бројните јавни настапи и соработка во аудиовизуелни проекти. Поради стручната и научна активност и големите достигнувања, застапен е во Првата македонска енциклопедија.

Добитник е на повеќе награди и признанија, меѓу кои и Повелбата Патрон на градот Св. Климент Охридски во 2007 година.

Н.С.Ј.

фото. Б. Стојаноски

Младата пејачка со охридско потекло Барбара Поповиќ во најдобрите 100 поп пејачи во Европа за 2024 година

Исклучително талентираната пејачка Барбара Поповиќ, која на пошироката јавност и стана позната по извонредниот настап во втората сезона на „IDJ Show“ во кое го освои второто место, е сврстена во најдобрите 100 поп пејачи во Европа кои треба да се следат во 2024 година според „Импала“, официјален партнер на „You Tube“.

Ова е голем успех затоа што Европа има илјадници изведувачи, велат од тимот на 23-годишната Барбара, дипломиран оперски пејач, која кариерата ја продолжи во поп пеењето.

Нејзината песна „Ватрена“ на познатиот македонски композитор и нејзин ментор во „IDJ Show-то“, Дарко Димитров, на You Tube има повеќе од 2,5 милиони прегледи, што само говори за потенцијалот на Барбара.

Барбара со одличниот настап на „IDJ“ Show, го сврте вниманието на себе. Особено впечатлива беше нејзината изведба на антологиската „Зајди Зајди“ за која семејството Сариевски ги отстапи авторските права, да може песната да биде отпеана и објавена на „YouTube“.

Барбара потпиша петгодишен договор со продукцијата „IDJ“, кој предвидува организирани настапи во Македонија, Србија и Црна Гора, издавање албум и соработка со најдобрите композитори во регионот. Во моментов таа подготвува две нови песни со видео записи кои наскоро ќе бидат објавени од продукцијата „IDJ“ во Белград.

Иако е млад изведувач, Барбара Поповиќ веќе има акумулирано големо искуство. Таа во 2013 ја претставуваше Македонија на детската Евровизија со песната „Охрид“, настапувала на реномирани фестивали, а добитник е на повеќе награди и признанија за оперско пеење во Италија и Србија.

Оперското пеење го сака и го негува, но сега за сега се одлучи кариерата да ја гради во поп пеењето, што не значи дека нема да се наврати на оперското пеење кое и е главната база, техниката и искуството, што и помогна да заплива успешно во поп водите, додаваат од тимот на Барбара.

Барбара Поповиќ, пред која е блескава иднина, има охридско потекло. Таа е ќерка на актуелната директорка на фестивалот „Охридско лето“, охриѓанката Наташа Поповиќ.

Н.С.Ј/Г.М.

Информативниот караван „Агенција за пошти поблиску до корисниците на поштенските услуги“ денеска во Охрид

Со едукативна средба со граѓани, студенти и претставници на локалниот бизнис-сектор, денеска во Охрид продолжи караванот на Агенцијата за пошти насловен „Агенција за пошти поблиску до корисниците на поштенските услуги“.

Претставниците на давателите на поштенски услуги, на Агенцијата за пошти и Канцелариите на Народниот правобранител преку средбите сакаат до корисниците на услугите да ги доближат своите активности, но и да ги запознаат со начинот на користење на правата на корисниците на поштенските услуги, како и да ја подигнат јавната свест за односната проблематика.

Целта на караванот на Агенцијата за пошти како регулаторно тело е да ги запознаеме корисниците на поштенски услуги кои се нивните права, но и обврски. Да ја запознаеме јавноста како треба да функционираат поштите. Истовремено, наша интенција е граѓаните да бидат поблиску до Агенцијата за пошти и на тој начин да го подобриме поштенскиот секрот во земјата, рече директорот на Агенцијата за пошти, Сретен Миладиноски.

Како што беше истакнато на денешната средба во Охрид, многу од корисниците не се запознаени со правните лекови што можат да ги користат доколку имаат некакви проблеми во користењето на услугите што ги даваат поштенските оператори.

Оттаму овие средби ги организираме за да ги посочиме насоките како да се реагира доколку имаат проблем со доставата на нивните пратки, како да поднесат рекламации кај давателите на услуги, па доколку е потребно да поднесат управен приговор, по што ќче се постапува согласно процедурите предвидени со Законот за пошти, рече тој.

Едукативниот караван после Тетово, Кичево и денеска во Охрид и Битола, предвидено е да продолжи низ градовите од источниот дел на земјата.

OhridNews

Околу 5-6 илјади лица живеат со дијабетес во Охрид, бројот секојдневно се зголемува

Околу 5-6 илјади лица живеат со дијабетес во Охрид и околината, но загрижува фактот што овие бројки секојдневно се менуваат. Потребна е едукација на населението, на лицата со дијабетес, нивните семејства, но и пошироката околина за заштита, значењето на редовните контроли, но и како да се пружи помош на лицата со дијабет, беше потенцирано на одржаното предавање на тема „Бубрежни заболувања кај лицата со дијабет“ во организација на Здружението на дијабетичари од Охрид.

Д-р. Даниела Мисоска Пендова од Интерното одделение при Општата болница во Охрид, вели бубрежните болести се значаен дел од патологијата кај пациентите, но некако како да е запоставен тој проблем и првенствено се кардиоваскуларните болести секогаш во таргет.

По најновите статистики веќе 2 од 5 пациенти кои имаат дијабетес имаат и хронична бубрежна болест. Дијабетесот е водечка причина за хронична бубрежна болест кај пациентите со тип 2, но не е за занемарување и кај пациентите со тип 1. Кога ќе земеме предвид дека хипертензијата е само по себе независен фактор за појава на хронична бубрежна болест најмалку 90% од пациентите со тип 2 имаат и хипертензија што уште повеќе го зголемува товарот, потенцира.

Секојдневно, вели, се среќаваат со ново дијагностицирани пациенти со тип 2 дијабет, односно тип 1 дијабет иако како интернисти малку помалку имаат евиденција за тип 1 бидејќи станува збор за помлада популација која ја водат педијатрите.

За жал, во постковид перидот имаме поголем број компликации, првенствено од страна на дијабетичната невропатија, односно оштетување кое дијабетот го прави на нервите и дијабетичното стапало, ампутации и различни рани. Пациентите не доаѓаа редовно на контроли, па имаме и многу нерегулирани пациенти. Тоа е данокот на пандемијата, истакнува Мисоска Пендова.

Многу е важно, вели, навременото дијагностицирање бидејќи во одредена фаза, особено на почетокот со добра контрола, со сите хигиенско-диететски мерки кои се база на третманот на дијабетот, може да се предизвика и извесна регресија.

Контролата е од првенствено значење за да се избегнат сите компликации, како гликемиската контрола, не само да се одржува нормална гликемија, туку таа да е и со што помалку осцилации. Честите високи и ниски вредности на шеќерот уште повеќе се утврдило дека прават оштетување. Важна е и регулацијата на другите фактори, коморбидитети. Невремената терапија и домашните мерења се многу битни, зошто од наше искуство пациентите кои почесто мерат шеќер ни се подобро регулирани.

Во поглед на хипер и хипогликемијата, истакнува дека хипергликемијата е многу страшна од аспект на тоа кога пациентот ќе види голема вредност, но сама по себе најчесто не прави моментално оштетување, не земјаќи ги предвид ектремните хипергликемии.

Но, прави оштетување на долг рок и тоа секако треба да се земе во предвид и да се појде на доктор. Тоа што е посебно важно и што сите пациенти и нивните блиски и пошироката околина треба да знаеме е како да реагираме при состојба на хипогликемија, која бара моментална интервенција. Посебно ако е екстремна хипогликемијата доведува до губиток на свест, пад, повреди, оштетување на мозокот, срцето кои се дирекно зависни од гликозата. Поправилно е ако видиме дека некој пациент има ваков проблем да му дадеме нешто благо да се напие, отколку да дадеме инсулин без мерење, или нормално да се повика помош. Затоа е битна едукацијата.

Во поглед на терапија, додава, дека во моментов има, но дел од терпијата повремено недостасува, а поради ограничувања на буџетите нема баш доволна количина од некоја посовремена терапија.

Потпретседателот на Здружението на дијабетичари од Охрид, Јулијана Шишоска, вели предавањето, а и целата програма за тековната година е со цел да се едуцира населението посебно дијабетичарите и нивните семејства за самиот дијабет, болестите и заштитата.

Точна бројка на дијабетичари во Охрид и околинава немаме бидејќи истата постојано се менува, но бројката се движи отприлика преку 5-6 000 лица. Станува збор за лица дијабетичари со тип 1 и тип 2 од најмала возраст до најстара. Битно е да се едуцирааат и лицата кои немаат дијабет за да не дојде до истиот, а дијабетичарите како полесно да се справат со него, вели Шишоска.

Потенцира дека како Здружение немаат финансиски можности да обезбедат апарати, сензори, ленти, иглички, но работат во оваа насока со помош на спонзори.

Меѓу проблемите со кои се соочуваат лицата со дијабетес се бројот на ленти кои ги добиваат за мерење на шеќерот. Добиваат 50 ленти на два месеци, а лицата кои се посебно на инсулинска терапија треба барем три пати дневно да го мерат шеќерот. Тоа значи дека нив им се потребни 90 ленти месечно, а не 50 на два месеци. Да не збориме за лицата кои се на таблетарна терапија, нема можност. Потребни се и има недостаток на сензори кои се многу важни посебно кај лицата кои имаат флуктација на шеќерот. Инсулин веќе се добива, во моментов не е проблем. Но, многу е мал и бројот на доктори, имам отприлика 5 илјади пациенти, а само тројца доктори супспецијалисти, додава.

Како дел од активностите на Здружението  Шишоска во јуни најавува и настан за подготовка на храна за дијабетичари со цел да се потенцира дека храната за дијабетичари не значи дека не треба да е вкусна и не значи дека подготовката на истата одзема многу повеќе време. Треба, вели, да се користат намирници богати со протеини, влакна, низок гликемиски индекс и да биде вкусна.

Инаку, бројот на лица заболени од дијабет од година во година се зголемува и на глоблано ниво и се очекува по некои светски прогнози до 2045 година бројката да надмине над 730 милиони заболени од дијабет.

Н.С.Ј.

Куќен притвор од 48 часа за две лица поради убиството на лекарот во Железара

Куќен притвор во траење од 48 часа е определен за две од лицата кои беа задржани за убиството на докторот во скопската населба Железара, соопшти утринава Јавното обвинителство.

Оттаму информираат дека ваква мерка е побарана со оглед на тоа што се уште се преземаат дејствија за обезбедување докази.

Јавен обвинител од скопското Основно јавно обвинителство, синоќа до судијата на претходна постапка од Основниот кривичен суд Скопје, достави предлог за определување мерка краткотраен куќен притвор, во траење од 48 часа, за две од лицата кои беа задржани во врска со убиството на лекар во скопската населба Железара. Тоа, со оглед на тоа што сѐ уште се преземаат дејствија за обезбедување докази. Предлогот е прифатен и бараната мерка е определена, се вели во информацијата од Јавното обвинителство.

Техничкиот министер за внатрешни работи Панче Тошковски вчера изјави дека се приведени вкупно три лица поврзани со убиството на лекарот.

Претресот е завршен во текот на доцните часови, се продолжува со други истражни дејствија, со цел да може да се утврди соодветно фактичка состојба, штом имаме дополнително нови информации, јавноста ќе биде благовремено известена, изјави Тошковски, при посетата на општина Босилово.

Шеесет и седумгодишниот лекар, минатата недела беше пронајден избоден до смрт во неговиот автомобил. Според првичните информации, мотивот за убиството не е поврзан со професијата на жртвата.

OhridNews

Во БиХ уапсени три лица кои барале пари за информација за исчезнатото девојче во Србија

Федералната полициска управа на Босна и Херцеговина, врз основа на информации од Министерството за внатрешни работи на Република Србија уапси три лица кои се осомничени дека преку социјалната мрежа „ТикТок“ објавиле дека се поврзани на исчезнувањето на девојчето Данка Илиќ, потврди српското МВР.

Припадниците на Службата за борба против високотехнолошки криминал ја идентификувале IP адресата на налог на корисник на територијата на Босна и Херцеговина кој во живо на „ТикТок“ изјавил дека исчезнатото девојче Данка Илиќ е во неговиот подрум.

Врз основа на тие информации, Федералната полициска управа на Босна и Херцеговина ги уапсила Б.Т, З.Т и М.Т, извршила претрес и утврдила дека информациите што ги дал осомничениот се лажни.

Федералната полициска управа на Босна и Херцеговина, согласно законот, ќе го изведе осомничениот кај надлежниот обвинител за понатамошно постапување.

Сараевскиот портал „Аваз“ синоќа објави дека истражителите од Одделот за компјутерски криминал на Федералната канцеларија за криминалистичка полиција, по IP адреса лоцирале лица кои тврделе дека имаат информации за исчезнувањето на малата Данка, и кои побарале 50.000 конвертибилни марки (околу 25.000 евра) за обелоденување на таа информација.

Потрагата по двегодишната Данка Илиќ, која исчезна во Бањско поле кај Бор, трае од вторникот. Во текот на ноќта полицијата дежурала во куќата каде исчезна девојчето. Во текот на вчерашниот ден со багер е расчистено земјиштето околу куќата во Бањско поле, од каде на девојчето и се губи секаква трага. Целта на ваквиот потег, како што јави дописникот на РТС, е да се провери дали има докази под гранките кои би помогнале во истрагата.

Во потрагата по девојчето учествуваат стотици припадници на полиција, жандармерија, ГСС, ловџии. Беа распоредени и беспилотни летала, со термални камери, а хеликоптерска единица го надлетува теренот.

Иако полицијата во средата соопшти дека потрагата на терен се прекинува, бидејќи сè укажува дека девојчето не е во областа од која исчезна, полициските сили и спасувачките екипи се се уште на терен. Воедно, полицијата информира дека во тек е интензивна оперативна работа.

OhridNews

фото. МИА

Костадиновска-Стојчевска за МРТ: Новиот закон за управување со Охридскиот Регион е јасен – нема легализација на дивоградби

Министерката за култура и претседателка на Националната комисија за УНЕСКО, Бисера Костадиновска – Стојчевска во однос на тековните активности поврзани со остварување на препораките на УНЕСКО вели дека во моментов Работната група ја изработува новата нацрт верзија на Законот за управување со Охридскиот Регион во која има предлог некои одредби да бидат избришани, во насока на избегнување на потенцијална закана за светското природно и културно наследство на Охридскиот Регион.

Спорниот член на кој укажуваат невладините организации, а кој се однесува на дефинирање на терминот „урбана трансформација“, во верзијата на новиот закон за управување се предлага да се брише. Се работи за термин на кој долго укажуваат и реактивните мисии во своите извештаи. Затоа решивме тој член да го тргнеме, односно да го видоизмениме за да не се дојде до мислење дека со тој член ние сакаме да придонесеме кон поголема легализација на дивоградбите. Напротив, се прави доста ригорозна селекција, односно скенирање на цел терен со помош на сите институции коишто имаат можност тоа да го направат, за да не се легализира ниту една дивоградба, изјави министерката Костадиновска-Стојчевска за Македонската-радиотелевизија.

На прашањето околу последниот извештај на УНЕСКО, влијанието на невладниот сектор и прашањето на дивоградбите, како и задржувањето на статусот на Охридскиот Регион, министерката додаде дека од страна на институциите секогаш се упатува апел до општините да даваат поопсежни информации во однос на дивоградбите. Костадиновска-Стојчевска објасни дека во предлог на новиот закон прецизно ќе се уреди и објасни темата со дивоградбите, за да не се добие впечаток дека ќе се пристапи кон нивна легализација.

Во однос на другите правни акти кои се донесени и на кои се работи за заштита на Охридскиот Регион, Костадиновска-Стојчевска изрази задоволство од активното учество на невладиниот сектор и од нивното присуство на терен, во Струга и во Охрид. Во однос на извештајот на Комитетот за светско наследство, и задржувањето на Охрид на листата на УНЕСКО, министерката за култура го изрази задоволството од позитивниот извештај за што, како што рече, придонес имаше и тоа што нашата држава е меѓу првите кои го преведоа Упатство за иматели на недвижни културни добра во Охридскиот регион – Светско наследство на УНЕСКО.

Ова Упатство кое помага во изработка на сите видови мислења, ние го препративме до општините коишто се инволвирани, и бевме навистина пофалени за напредокот којшто го имаме. Најголем удел во тој позитивен извештај има Комисијата којашто до сега функционираше при Министерство за култура, а сега според договор и според Законот се префрла во Минситерство за животна средина и просторно планирање, објасни министерката за култура.

Таа додаде дека токму таа комисија браник којшто се бави со сите мислења од општините, инвеститорите, архитектонски друштва и планерите во урбанизмот.

Костадиновска-Стојчевска за МТВ истакна дека удел за позитивниот извештај од УНЕСКО имаше и соработката со Албанија, зашто за прв пат оваа година беше изготвен и заднички извештај од двете држави кон УНЕСКО.

OhridNews

Фото: Министерство за култура

Денес чествување за ликот и делото на Гоце Жура, по повод петгодишнината од неговото упокојување

Денес во спомен-куќата на Христо Узунов со почеток во 12 часот ќе се одржи Чествување за ликот и делото на Гоце Ангеличин-Жура (1951-2019), нашиот познат историчар на уметност.

Настанот е во организација на д-р Гордана Ангеличин-Жура и Горан Митрески, историчар кустос, во соработка со НУ Завод за заштита на спомениците на културата и Музеј-Охрид. За ликот и делото на Гоце Жура ќе говорат археологот Паско Кузман, историчарот на уметност Јорданка Матова, Директорот на НУБ „Григор Прличев“ Охрид м-р Милчо Јованоски и проф. Д-р Климент Наумов, доцент при Факултетот за туризам и угостителство-Охрид.

Гоце Жура е основоположник и втемелувач на теренските истражувања на пештерските цркви во охридско-преспанскиот регион како и активен истражувач на постоечки и новооткриени сакрални објекти во Охрид. Неговите истражувања резултирале со уникатни откритија драгоцени за македонската наука, како на пример дотогаш неоткриени ликови на св. Климент, а само во последната книга има мапирано 20 базилики и 43 цркви во стариот дел на Охрид. Зад себе има оставено импресивна библиографија од 20 книги и над 60 научни трудови.

Овој настан овозможува охриѓани да се потсетат на нивниот сограѓанин и со своето присуство да му оддадат почит за непроценливиот придонес кон науката и афирмацијата на нашето културно-историско наследство и православната црковна историја.

OhridNews