Охридскиот новинар Сашо Нелоски денес оствари средба со градоначалникот на Општина Охрид, Кирил Пецаков. По повод неговото пензионирање од страна на градоначалникот му беше врачена благодарница не само како признание за неговиот децениски стаж, туку и за неговиот несебичен влог во македонското новинарство.
Сашо не беше само новинар. Tој низ децениите стана автентичен хроничар на нашиот Охрид. Преку неговите текстови и извештаи се афирмираа охридските вредности, култура и традиција, понатака Охрид достоинствено беше претставуван како духовен и туристички бисер и можеби и најважното е што вистината се чуваше како патоказ за идните генерации. Му благодариме што со гордост го носеше гласот на Охрид во етерот, посочува Пецаков.
Инаку, целиот работен век од близу 38 години, но и претходниот хонорарен стаж од 1986 кога прв пат напишал новинарски текст, Нелоски му остана верен на тогашната РТС, а сега јавниот сервис МРТВ.
Зад неговиот работен век како што сам пресметал стојат импозантни над 14 000 текстови кои поминале низ етерот и секако оставиле трага во глобалниот медиумски простор.
OhridNews
