Народен театар Охрид организира две хуманитарни театарски изведби, со цел собирање средства за лекување на нашата сограѓанка Ева во Германија.
На 26 март премиерно ќе биде изведена детската претстава „Чаплин во црно-белиот свет“, во режија на Ѓорѓи Ризески. На 27 март, по повод Меѓународниот ден на театарот, ќе се одигра претставата „Парите се отепувачка“, во режија на Андреј Цветановски. Средствата собрани од продажбата на билети од двете претстави ќе бидат целосно наменети за поддршка на лекувањето на Ева, велат од Народен театар Охрид.
„Чаплин во црно-белиот свет“ е детска театарска претстава инспирирана од делото, поетиката и духот на Чарли Чаплин, но создадена како оригинален сценски настан, наменет за современата детска публика. Претставата тргнува од едноставна, но силна идеја: да го гледаме светот онака како што го гледа дете – низ игра, љубопитност, смеа и фантазија. Тоа е истовремено и начинот на кој Чаплин го гледал светот во своите филмови. „Чаплин во црно белиот свет“ е претстава која ги охрабрува децата да размислуваат, да чувствуваат и да веруваат дека нивната игра има моќ. Тоа е театар кој не поучува со зборови, туку со слика, движење и радост. Претставата ќе се одигра во склоп на чествувањето на Меѓународниот ден на театарот. Претставата ќе се одигра денес со почеток во 19 часот, а цената на билетот е 150 денари.
Во претставата играат: Симона Димковска / Филип Кипровски, Адријана Билаловиќ Тодороска, Павел Маслов, Елизабета Стефановска Јандреовска, Биљана Билаловиќ Вељаноска и Ивица Цонев. Режија: Ѓорѓи Ризески.
„Парите се отепувачка“ спаѓа во класиците на македонската драматургија и како таква секогаш е подложна за нови сценски прочити. А тоа е можно затоа што темата е секогаш универзална: Која е жртвата што ја прави оној што оди на печалба, но и која е жртвата на семејството кое останува и чека печалбарот да се врати? Дали вреди животот да се стави на пауза заради соништата на семејството? Дали изгубеното време се надоместува со било кои пари? Низ овие поставени прашања се обидовме да направиме античка трагедија низ македонскиот мелос од битовата драма на Ристо Крле. „Парите се отепувачка” од Ристо Крле е во адаптација и режија на Андреј Цветановски. Во истата играат МИТРЕ – Стрезо Стаматовски, АНЃЕЛЕ – Филип Кипровски, МАРА – Марија Новак, КАТА – Адријана Билаловиќ – Тодороска и СОФРЕ – Никола Тодороски. Претставата ќе се одигра утре со почеток во 20 часот, а цената на билетот е 300 денари.
Од Народен театар упатуваат повик до граѓаните да ја поддржат оваа хуманитарна иницијатива и преку своето присуство да дадат придонес во оваа значајна акција.
OhridNews
