Сѐ почна во ноември 1999 година, кога неколку пријатели од Аделаида, Австралија, се договорија да не ги бричат ​мустаќите цел еден месец. На облогот кој имаше за цел да му даде малку рурален изглед на современиот маж, му се приклучија околу 30 луѓе и истрајаа во својата одлука. Само неколку години подоцна, 2004, во Мелбурн 400 мажи ѝ се приклучија на идејата кога беше формирана и Фондација за собирање пари за истражување на рак на простатата.

„Movember“  е спој од два збора, од австралиската „сленг“ кратенка за  мустаќи „mo“ и „November“ што во превод од англиски значи ноември.

Движењето со пуштање мустаќи, а во некои земји и  брада доби и глобален карактер, па сега десетици илјади луѓе ширум светот секоја година се приклучуваат на „Мовембер“. Покрај растењето мустаќи, месец ноември е посветен на бројни едукации за ментална поддршка во справувањето со ракот на простатата, поддршка во лекувањето како и ширење на свеста за машкото здравје.

Успехот на лекувањето при рано откривање на ракот на простата, е голем. Па, затоа, се препорачува мажите постари од 50 години да одат на лекарски преглед барем еднаш годишно, а мажите над 20 години да прават самопреглед два пати годишно.

 

OhridNews