НУ Музејот „Д-р Никола Незлобински“ годинава ќе го реализира проектот „Колекционирање на видови од фауна на дно од Охридското Езеро со цел е заштита на движното културно наследство“. Проектот е во рамки на годишната програма на Установата поддржана од Министерството за култура и туризам.
Со реализацијата на проектот, кој ќе се реализира во три фази, во соработка со Хидробиолошки Завод – Охрид, како што истакна директорката на Музејот, Цветлана Василевска, ќе се колекционираат различни видови фауна која живее на дното на Охридското Езеро, со што ќе се збогати музејската збирка изложена во Природонаучната поставка.
Првата фаза ќе почне во мај и ќе ги опфати теренските активности за колекционирање од различни локалитети на Охридското Езеро. Втората фаза ќе биде лабараториска анализа и обработка во лабораторијата на одделението за фауна на дно при Хидробиолошкиот завод во Охрид и во третата фаза ќе биде изложен колекционираниот детерминиран материјал во Природонаучната поставка во Музејот при што ќе бидат изработени и стручни текстови за карактеристиките на видовите, информира Василевска.
Охридското Езеро, потенцира, располага со многубројни ендемични и реликтни растителни и животински елементи, во чија група спаѓа фауната на дно.
Фауната на дно ја сочинуваат организми кои го населуваат дното на акватичните екосистеми постојано или пак на дното минуваат некоја од животните фази, а нивната улога за слатководните екосистеми е од големо значење. Тие се важен дел од синџирите за исхрана. Во оваа група спаѓаат полжави стари околу 30 милиони години, ендемични видови од групата на сплескани црви, пијавици, ракчиња, школки и многу други. Сите тие се значајни за еволуцијата на Охридското Езеро, но и за живиот свет воопшто, истакна Василевска.
OhridNews
