На денешен ден во 1980 година во Охрид почина Ванчо Николески, истакнатиот македонски романсиер, раскажувач и поет, Ванчо Николески. Претставник е на првата повоена генерација македонски писатели за деца и млади.
Основно училиште завршил во родното место, гимназија во Охрид, а учителска школа завршил во Скопје. Тој е еден од првите учители, кој низ селата на штотуку ослободената Дебрца од бугарскиот окупатор учителствувал на македонски јазик.
По ослободувањето работел како новинар и уредник во весниците за деца “Титов Пионер“ и “Пионерски Весник“, како и во емисиите за деца емитувани на радио-Скопје и радио-Битола. Значаен дел од својот работен век поминал во Битола како истакнат просветен работник.
Уште како ученик и млад учител пишувал песни за деца па во периодот од 1945-1960 тој бил најприсутниот македонски автор во детската литература. Децата и детството биле негова постојана тема и инспирација. Детските весници, читанките и најпознатите антологии на македонската литература за деца се збогатени со прекрасните песни на овој плоден творец.
Негови најпознати дела се поемата “Мице“, “Мое село“ (песни), “Чудотворен кавал“ (раскази), “Четиринаесет илјади ослепени“ (историска поема за времето на Цар Самоил), “Волшебното самарче“(роман), “Гоце Делчев“(роман) и многу други. Добитник е на повеќе награди и признанија меѓу кои најзначајни се: “Климент Охридски“, “Младо Поколение“, “Курирче“, “11 Октомври“, “Змаева награда“ и многу други.
Бил член на Друштвото на Писатели на Македонија од 1950 година. Роден бил во селото Црвена Вода, Охридско, на 10 јуни 1912 година.
OhridNews
