Градоначалниците на Охрид и Веспрем, Кирил Пецаков и Ѓула Порга, викендов во Унгарија го потпишаа Договорот за збратимување, со што се отвора ново поглавје на партнерство помеѓу овие два града.

Овој документ не е само протоколарна обврска, туку платформа за конкретна соработка во повеќе области како култура, туризам, образование, спорт, дигитализација… Убеден сум дека размената на искуства и европски практики ќе донесе видливи придобивки. Охрид продолжува да се етаблира како отворен, европски град кој гради силни и долгорочни партнерства, вели градоначалникот на Охрид Кирил Пецаков. 

Во рамки на посета на Веспрем, Пецаков се сретна и со Чаба Барта, претседателот на европскиот ракометен гигант РК Веспрем.

​Фокусот на нашиот разговор беше насочен кон патот на ГРК Охрид и нашите досегашни успеси во Европскиот куп и домашната лига и куп, за кои добивме искрени честитки. Големо признание е кога клуб од светски ранг како Веспрем ги препознава нашите напори и напредок. Дополнително дискутиравме за стратегии за развој на клубовите и иднината на европскиот ракомет, истакна Пецаков.

Тој упати официјална покана до РК Веспрем да биде дел од традиционален ракометен турнир во Охрид “Крсте Андоновски”.

​Г.М.