Започна 52-от Општински натпревар по прва помош под мотото „Првата помош спасува животи“ во организација на Црвен крст Охрид. Почетокот на натпреварот беше означен од страна на градоначалникот на Охрид Кирил Пецаков.
Особено ме радува што и оваа година натпреварот се реализира според европски стандарди, преку реалистични симулации и ситуации на повеќе локации низ Охрид. Верувам дека Охрид и во иднина ќе продолжи да биде град кој ја негува хуманоста и солидарноста, рече Пецаков.
На натпреварот, стекнатите знаења и техники за укажување на прва помош ќе ги покажат повеќе од 200 ученици-натпреварувачи од основните и средни училишта од Охрид и Дебрца, организирани во екипи во категорија подмладок и категорија младина.
И оваа година на општинскиот натпревар по прва помош ќе се применуваат критериуми и стандарди кои се спроведуваат при одржување на европските натпревари по прва помош. Во таа насока, натпреварувачите, но и посетителите на овој настан, на повеќе пунктови низ централното подрачје на градот Охрид, вклучувајќи го Кеј Македонија, Билјанини Извори и други, ќе бидат сведоци на симулирани случки на несреќи, изведени од членовите на актерските групи на Црвен крст Охрид, како и реалистички приказ на повреди, подготвени од посебно обучени шминкери за повреди на Црвен крст Охрид, посочуваат.
За регуларноста и оценувањето на натпреварувачите ќе се грижат 20 судии за прва помош на Црвен крст Охрид.
OhridNews
