По повод празникот Воскресение Христово – Велигден, честитка до Неговото Високопреосвештенство, Митрополитот Дебарско-кичевски, Господин Георгиј и до сите православните верници упати градоначалникот на Охрид Кирил Пецаков.
Ваше Високопреосвештенство,
Во овој серадосен ден, кога Христос Воскресна од мртвите и смртта со смрт ја победи и на оние во гробовите живот им подари, ми претставува особена чест и духовна радост да Ви го упатам најторжествениот поздрав на нашата вера.
Христос Воскресна!Ваше Високопреосвештенство, Ви посакувам од Семилостивиот Бог крепко здравје, долгодејствие и истрајност во Вашата архипастирска служба, за да продолжите мудро да не водите по патот на вистината и спасението.
Драги сограѓани,
Нека благодатта на Воскреснатиот Господ се всели во Вашите домови и во Вашите срца. Нека овој Празник над празниците биде поттик за наше духовно преобразување и смирение. Славејќи го Христовото Воскресение, да се сетиме на неговите зборови:
„И ете, Јас сум со вас преку сите денови до свршетокот на светот. Амин!“
Нека радоста на празниот гроб ја избрка секоја тага од Вашите лица, а светлината на Неговото лице нека го осветлува секој ваш чекор.
На многуја и блага лета!
ХРИСТОС ВОСКРЕСНА! НАВИСТИНА ВОСКРЕСНА!, вели во честитката градоначлникот Пецаков.
OhridNews
