Првиот натпревар ќе се игра на гостински терен, а реваншот во Македонија. Победникот од мартовскиот двомеч ќе настапува во Лигата Б во следното издание.

Фудбалската репрезентација на Македонија ќе игра против Кипар во баражот за опстанок во Лигата Б од Лигата на нации, одлучи денешната ждрепка во седиштето на УЕФА во Нион. Македонската селекција беше меѓу носителите, што ѝ носи домашен терен во реваншот. Победникот од двомечот ќе обезбеди место во Лигата Б за сезоната 2028/29, додека поразениот ќе настапува во Лигата Ц.

Баражите се предвидени за март 2027 година. Според рамковниот календар на УЕФА, првите средби ќе се играат на 25 или 27 март, а реваншите на 28 или 30 март. Точниот распоред за секој двомеч се објавува по ждрепката. При израмнет вкупен резултат, по реваншот ќе се играат продолженија, а ако е потребно и пенали.

Кипар до баражот стигна како второпласиран во својата група од Лигата Ц, зад Црна Гора. Во шест натпревари забележа по две победи, нерешени средби и порази, односно освои осум бода. Победите ги оствари против Летонија со 2:1 и Ерменија со 2:0.

Според податоците на ФФМ, Македонија и Кипар досега одиграле два меѓусебни натпревари, во квалификациите за Европското првенство. Во декември 1994 година Македонија славеше во Скопје со 3:0, со хет-трик на Бошко Ѓуровски, а во октомври 1995 година во Лимасол беше 1:1, со погодок на Борче Јовановски за македонската селекција.

На ждрепката беа одредени и останатите бараж-двомечи, како и четвртфиналните пресметки за трофејот. Меѓу најатрактивните се Шпанија – Франција и Холандија – Португалија.

Бараж Б/Ц

Кипар – Македонија

Естонија – Романија

Фарски Острови – Грузија

Белорусија – Израел

Бараж А/Б

Босна и Херцеговина – Данска

Унгарија – Србија

Република Ирска – Хрватска

Словенија – Велс

Четвртфинале Лига на нации

Шпанија – Франција

Норвешка – Англија

Холандија – Португалија

Белгија – Германија

Првонаведените репрезентации се домаќини на првите натпревари. Победниците од баражите А/Б ќе играат во Лигата А, а поразените во Лигата Б. Четвртфиналните победници ќе се пласираат на завршниот турнир во јуни 2027 година.

OhridNews
Фото: ФФМ | Фејсбук