Инициран во 1961 година од страна на Меѓународниот театарски институт, Светскиот ден на театарот се одбележува насекаде низ светот со различни национални и меѓународни театарски настани.
Народниот театар Охрид вечерва, во 20 часот, во Центарот за култура „Григор Прличев“, ќе ја изведе претставата „Парите се отепувачка“, во режија на Андреј Цветановски во склоп на чествувањето на Меѓународниот ден на театарот и истата има хуманитарен карактер.
„Парите се отепувачка“ спаѓа во класиците на македонската драматургија и како таква секогаш е подложна за нови сценски прочити. А тоа е можно затоа што темата е секогаш универзална: Која е жртвата што ја прави оној што оди на печалба, но и која е жртвата на семејството кое останува и чека печалбарот да се врати? Дали вреди животот да се стави на пауза заради соништата на семејството? Дали изгубеното време се надоместува со било кои пари? Низ овие поставени прашања се обидовме да направиме античка трагедија низ македонскиот мелос од битовата драма на Ристо Крле. Во претставата играат МИТРЕ – Стрезо Стаматовски, АНЃЕЛЕ – Филип Кипровски, МАРА – Марија Новак, КАТА – Адријана Билаловиќ – Тодороска и СОФРЕ – Никола Тодороски. Претставата ќе се одигра утре со почеток во 20 часот, а цената на билетот е 300 денари.
Од Народен театар упатуваат повик до граѓаните да ја поддржат оваа хуманитарна иницијатива и преку своето присуство да дадат придонес во оваа значајна акција. Сите средства од продадените билети од вчерашната и денешната претстава ќе бидат донирани за лекување на нашата сограѓанка Ева во Германија.
OhridNews
