Започна реализацијата на проектот за изградба на канализационен систем за отпадни води во струшкото село Враништа. Проектот опфаќа изградба на комплетна примарна и секундарна канализациона мрежа, поставување ревизиони шахти и приклучоци за домаќинствата, како и обезбедување контролиран одвод на отпадните води.

Станува збор за петти проект што се реализира во општина Струга, а во текот на овој месец, според најавата на градоначалникот на Струга, Менди Ќура, треба да се реализираат уште три други проекти.

Поставуваме камен-темелник на проект за кој се чекало со години. Проектот е петти што се реализира во Струга, а во текот на овој месец ќе се реализираат уште три, така што вкупната вредност на сите осум проекти е околу девет милиони евра. Ќе продолжиме да работиме за Општина Струга со реализација и на други проекти. Овој проект е многу важен. Заедно со Владата ќе работиме за подобар живот за граѓаните во Струга, рече Ќура.

Ова е проект што има децениско значење бидејќи е ветуван неколку децении и јас сум убеден дека со реализацијата на овој проект, но и на сличните проекти не само во Струга туку ширум цела Македонија полека но сигурно Владата со својата работа го разбива стереотипот од минатото дека сите политичари се исти, дека сите влади се исти, гледаат само за себе, а не за граѓаните, рече премиерот Христијан Мицкоски.

Ценам дека со нашата работа, посветена, фокусирана се разбира во рамките на нашите можности и ресурси тоа што можеме да го направиме го правиме исклучиво и за интересот на граѓаните.  Убеден сум дека со политиките на Владата, Струга е препознаена и Струга ќе биде еден од нашите главни приоритети во годините коишто доаѓаат, посочи Мицкоски.

Проектот се реализира со финансиска поддршка од Министерството за животна средина и просторно планирање.

Заштитата на животната средина значи и инвестиции во инфраструктура во помалите места, кои со години биле запоставени и без основни услови за живот. Само со рамномерен развој и опфат на сите можеме да направиме вистински зелен пресврт, рече министерот за животна средина и просторно планирање, Муамет Хоџа.

Проектот е во вредност од 91.427.969 милиони денари, целосно финансирана од МЖСПП преку Вториот повик од Унгарскиот кредит, со рок на реализација од 12 месеци.

Инаку, во Струга продолжуваат активностите за уредување и модернизација на туристичката улица, а се работи и на локалниот пат кон населбата Езерски Лозја.

Н.С.Ј.