Завршува во рок рехабилитацијата на магистралниот пат Охрид – Св. Наум во должина од 24,3 километри, информираат од Јавното претпријатие за државни патишта (ЈПДП).
Иако важноста на делницата Охрид-Св.Наум е исклучителна бидејќи е магистрален пат кој има регионално значење и претставува патна врска со Република Албанија цели четири децении чекаше за рехабилитација која започна во август 2023 година и која сега е на самиот крај и завршува во предвидениот рок за изведба пред почетокот на летната сезона, а тоа е јуни 2025 година, потенцираат од ЈПДП.
Со реконструкцијата, велат, заради зголемување на безбедноста во сообраќајот како и прегледност на патот се изврши и растеретување на косини од нестабилен карпест материјал и се монтираше заштитна челична мрежа на косините.
Во завршна фаза е поставувањето на вертикалната сигнализација, односно сообраќајните знаци, како и означувањето на хоризонталната сигнализација т.е боење со патарска боја. Привршува и поставувањето на еластичната одбојна ограда. Со рехабилитација на оваа главна туристичка сообраќајна делница, ја подигнуваме безбедноста во сообраќајот и обезбедуваме квалитетна патна врска од Охрид до манастирскиот комплекс Св. Наум. Исто така, ја подобруваме патната мрежа, го подигнуваме квалитетот на туристичкиот потенцијал и го потикнувме економскиот развој во охридскиот регион, додаваат од ЈПДП.
Инаку, инвестиционата вредност за рехабилитација на овој патен правец е 11,7 милиони евра, средства обезбедени од буџет на ЈППД.
OhridNews
фото. ЈПДП
