На денешен ден во 1903 г. почна Илинденското востание на македонскиот народ против османлиската власт, што се смета за еден од најзначајните настани во нашата историја.  За време на востанието се водеа битки кај селото Смилево, Демирхисарско, на Слива и на Мечкин Камен, Крушевско, кај Карабуница, Кичевско, кај селото Арменско, Леринско, Чаништа, Мариовско, како и во месноста Рашанец – Охридско, каде се водела една од најкрвавите илинденски битки.

Во Охрид востанието кое го предводел војводата Христо Узунов се одвивало во осумдесетина села. Кај Рашанец охридските востаници за да го спасат населението од терор и колеж формирале бегалски логор каде имало 2000 луѓе.  Логорот го обезбедувале 120 востаници кои не можеле да се спротистават на 3000 турски аскер во одмазничкиот налет. Масакрот во Рашанец траел 15 часа. Околу 200 мажи и жени биле убиени, а сите преживеани моми и жени биле силувани. На турска страна загинале 200 војници.


Охридска илинденска чета

Охриѓани им се поклонуваат на Илинденците кои несебично ги дадоа животите за слободата што во втората светска војна беше потврдена на вториот Илинден во манастирот Прохор Пчински каде на Првото заседание на АСНОМ беа удрени темелите на македонската држава.

По повод големиот национален празник во охридско Велгошти синоќа се одржа голем народен собир. Празникот денеска ќе биде одбележан и во  Плаќе, чиј патрон е Св. Илија на кого е посветена селската црква. Таму денеска ќе биде изведен импровизиран напад на селото од комити, ќе биде положено свежо цвеќе и ќе се одржи историски час пред споменикот на паднатите борци.

Во рамките на прославата, на која ќе присуствуваат претставници на локалната самоуправа, ќе биде пуштена во употреба реновираната селска чешма.

OhridNews