По вчерашните остри тонови и пораки испратени од протестот во Струга, против навредите на исламската религија на карневалот Вевчани, денеска стигнуваат смирувачки пораки и апели за смирување на тензиите во градот кој со векови е пример за соживот.

Непознати сторители вчера го запалиja македонското знаме пред Споомен куќата на Браќата Миладиновци во центарот на Струга и каменуваa автобус на локален автопревозник кој се обраќа кон Вевчани, а пред зградата на општината на јарболите наместо официјалните знамиња и симболи беа истакнати верски знамиња. Градоначалникот Мерко смета дека случувањата во Струга се увезени и многу опасни игри кои можат да влијаат на добрите меѓуетнички односи во градот. Иако го предводеше вчерашниот протест тој вели дека собирот не бил политички мотивиран, а го поддржал затоа што смета дека се повредени чувства на граѓаните, и дека тоа ќе го прави секогаш кога ќе биде загрозен соживотот во Струга.

-Ако бидат повредени чувствата на православните верници и да има протест на свештениците јас ќе бидам со нив, рече Рамиз Мерко. Тој апелираше до граѓаните да не подлегнуваат на провокациите, кои според него не се дела на стружани, туку се дојдени од надвор.

Организаторите на вевчанскиот карневал и одговорните во општината, од кои муслиманските верници бараат извинување, на обвинувањата реагираа со соопштение во кое се посочува дека карневалските маски претставуваат сопствената перцепција  на учесниците за настаните и личностите што ја одбележале годината и дека  манифестацијата е грубо злоупотребена и искористена како политичка алатка, за што, како што се наведува, говори фактот што протестот се организира 14 дена по завршување на Карневалот.

– Протестот не е задоцнет и се случи дури сега затоа што очекувавме дека општина Вевчани ќе реагира и ќе ги осуди испадите на карневалот, каде може да се исмејуваат политичарите и случувањата, но никако да се навредуваат чувства на верници и нации, возврати Мерко.

 
За разлика од одговорните во општините Струга и Вевчани, граѓаните  причината за подигнатите тензии ги гледаат во политичарите.

-Ова има политичка позадина во тоа сме убедени сите, вели граѓанин на Струга.

-Одговорни за ваквите состојби се Ахмети и Груевски кои мислат само на себе, а не на народот кој нема леб да јаде, додава друг стружанец.

По последните случувања,вонредна седница одржа Комисијата за односи меѓу заедниците (КОМЗ) од Струга, на која било расправано за меѓуетничките односи во општината.

Со цел надминување на новонастанатите состојби Комисијата за односи меѓу заедниците предлага:
 
– Градоначалникот на Општина Струга што е можно побрзо да се сретне со градоначалникот на Општина Вевчани за да ги разгледаат новонастанатите состојби, како и да излезат со заеднички став;
– Претставниците на Струшкото муфтиство со посредништво на градоначалникот на Општина Струга, да се сретнат со градоначалникот на Вевчани и организаторите на карневалот;
– Одржување на вонредна седница на советот на Општина Струга, со единствена точка на дневен ред:  Разгледување на меѓуетничките односи во Општина Струга;
– Став на КОМЗ е дека спортистите што ги бранат боите на Република Македонија се претставници на сите граѓани и затоа нивниот пречек треба да биде граѓански и на него да земат учество претставници на сите заедници;
– Комисијата ги осудува сите активности кои негативно се рефлектираат врз добрите меѓуетнички односи во општината и државата;

Дополнително во насока на смирување на страстите КОМЗ апелира до населението и остантатите засегнати страни да бидат воздржани, да не подлегнува на било какви провокации кои што може негативно да влијаат на добриот соживот помеѓу граѓаните на Општина Струга.

Во Струга денеска е пазарен ден. Во градот е раздвижено но мирно и без тензии. Од полицијата информираат дека не се забележани нови инциденти, како и дека работат на расветлување на немилите настани кои се случија вчера. Превентивно формиран е специјален полициски тим чија задача ќе биде да ги спречи евентуалните инциденти.

OhridNews