За еден од двата понудени модели,за субвенционирани станбени кредити преку проектот „Купи куќа, купи стан“, граѓаните ќе може да аплицираат и во текот на ноември и декември.
Од министерството за финансии информираат дека за првиот модел „Половина рата“ Владата, ќе се плаќа половина од месечната рата (главница и камата) во првите 5 години од отплатата на кредитот. Каматата на станбениот кредит е субвенционирана и изнесува 4,99 проценти за првите три години, а 5,5 отсто за четвртата и за петтата година од отплатата.
Според вториот модел „Половина учество“, Владата ќе плати 50 отсто од учеството за кредит за купување стан или за изградба на куќа или најмногу до 6.250 евра за кредит од 50.000 евра. Каматата на станбениот кредит е субвенционирана и изнесува ЕУРИБОР + 4,5 процентни поени во текот на целиот период на отплата.
Апликации може да се поднесуваат во НЛБ Тутунска банка, Стопанска банка – Скопје, Охридска банка, Шпаркасе, Стопанска банка – Битола, Алфа банка, ТТК банка и Прокредит банка.
