Само неколку дена откако Уставниот суд донесе одлука со која ги стопира градежните работи во населбата Бејбунар, градоначалникот на Охрид, во изјава за медиумите истакна дека треба да се изгради предвидениот станбено-деловен комплекс  во Охрид, чија вредност се проценува на околу 100 милиони евра.

–Уставниот суд ја оспори одлуката за ДУП – Бејбунар 2 поради повреда на постапката при носењето на планот. Моја и заложба на стручните служби е дека на тој потег треба да се гради, бидејќи сметам дека таа локација е токму таа каде треба да се градат станбени згради. Така да јас ќе се заложам заедно со моите служби да се поведе повторно една постапка, меѓутоа законска, каде што ќе се почитуваат прописите и регулативите кои важат за донесување на еден детален урбанистички план и законска урбанизација, и после спроведување на таа законска постапка треба да продолжи урбанизацијата, односно сметам дека во тој дел на градот треба да се гради.-изјави Бакрачески.

Инаку Министерството за локална самоуправа го оспори деталниот урбанистички план донесен во октомври 2008-ма година, бидејќи Советот на општина Охрид го донел без согласноста од Министерството за транспорт и врски, која прво била дадена, а после 15 дена повлечена на барање на Управата за заштита на културно наследство за привремена  двегодишна заштита на археолошкиот локалитет „Бејбунар“.

Исто така, пред Судот се појавила дилема за деталниот урбанистички план кој е опфатен со оспорената одлука, бидејќи на просторот за кој се однесува се наоѓаат извори на квалитетна вода за пиење.

OhridNews