Баросо посочи дека предложениот дијалог не претставува класичен мониторинг, туку механизам за унапредување на реформите на земјата неопходни за пристапување кон Европската унија.
– Дијалогот што на високо ниво ќе се одржува два пати годишно во Скопје и Брисел ќе се случува без оглед на пристапните преговори. Сметаме дека тоа е многу важно, но не би го нарекол скрининг, туку дијалог на високо ниво за реформите кои се одвиваат, со цел да ги поддржиме истите.-појасни Баросо.
Претседателот на ЕК подвлече дека е многу важно Македонија да го задржи темпото на реформи, како и да го реши прашањето на името што е можно поскоро.
– Ние го дадовме нашиот предлог за отпочнување на преговорите, но за тоа да се случи потребно е да се реши прашањето за името и се надевам дека тоа ќе биде направено поскоро, а не подоцна, истакна Баросо. Тој рече дека на премиерот Груевски му ја посочил потребата од напредок во политичкиот дијалог, судската и административна реформа и борбата против корупцијата. Баросо побара и враќање на европската агенда во врвот на приоритетите, како и постигнување на консензус за стратешките цели помеѓу главните политички актери, односно, како што рече, да се создаде култура на компромис.
-Круцијално е следните избори да бидат целосно транспарентни и во согласност со меѓународните стандарди. Исто така сметам дека е клучно новинарите да можат да ги изразуваат своите гледишта слободно. Комисијата не се меша во посебни случаи но очекува објективна примена на законите.-изјави на прес конференцијата по средбата со премиерот Груевски, претседателот на ЕК.
Одговарајќи на новинарско прашање, премиерот Груевски истакна дека заложба на Владата е во Македонија да има слободно новинарство во склад со европските стандарди и закони, кои, како што рече се очекува да бидат почитувани и од страна на медиумите.
-Тоа ќе остане дел од нашите заложби и во иднина во секој поглед, како во делот на законодавството во ЕУ за слободата на медиумите, така и на законодавството на ЕУ во другите делови кои што треба да ги почитуваат медиумите, пред се плаќањето на даноци и законското работење, рече Груевски.
Македонскиот премиер истакна дека спорот со името е уникатен предизвик кој ги загрозува националните интереси на земјата и дека ќе биде направено се тој што поскоро да биде надминат.
– Целта е да се изнајде трајно и одржливо решение кое ќе биде прифатливо за двете земји и народи. Решение кое ќе се базира на почитување на основните принципи и вредности на ЕУ и нема да наштети на националната, лингвистичката и културната самоидентификација на македонскиот народ и име. – рече Груевски.
Високата европска делегација во Охрид оствари средба и со претседателот Ѓорѓе Иванов. Претседателот на ЕК, Жозде Мануел Баросо, во хотелот „Инекс Горица“ одржа предавање за европските перспективи на земјата, а предвидено е попладне тој да се сретне со лидерите на ДУИ, Али Ахмети и на СДСМ, Бранко Црвенковски.
