Во реакцијата на Здружението на Истомисленици на Ататурк во Македонија, стои дека се повредени чувствата на оваа етничка група во земјава. Тие најостро ја осудуваат оваа изјава на Ивановски и бараат од Владата, во име на добрите односи кои ги има земјава со Турција, министерот да се огради од неа и јавно да се извини. „Изјавата е говор на омраза насочен кон граѓаните на турската заедница во Македонија, кои плаќаат данок за да може министерот да земе плата. Турската заедница е згрозена од стереотипите промовирани од јавните личности кои можат да им штетат на пријателските односи помеѓу двете земји“ – стои во реакцијата на здружението.
Исто така, турската заедница е загрижена поради односот на Ивановски кон турските серии.
Во изјавата дадена вчера, министерот Ивановски истакна дека наскоро ќе отпочне јавна дебата за новиот Закон за медиуми кој предвидува нови регулативи. Со нив ќе бидат опфатени и сериите кои сега доминираат на дел од македонските телевизии.
-Ќе се бара 30 проценти од емитувањето во клучните часови од 8 наутро до 20 часот навечер да биде македонско производство. 40 проценти во 2014. година, дури 50 проценти во 2015. година. Со тоа ќе се стимулира македонската продукција“, изјави министерот Ивановски.
