Березовски: Охридско лето е еден од најспектакуларните светски фестивали

Миленикот на охридската публика, рускиот виртуоз и еден од најпознатите светски пијанисти, Борис Березовски, синоќа одржа уште еден незаборавен концерт во катедралната црква Св. Софија. Тој настапи втор пат во Охрид токму на барање на публиката која ја воодушеви со концертот, исто така во Св. Софија, пред две години.

Борис Березовски редовно настапува како солист со светски познатите оркестри како Њујоршкиот филхармониски оркестар, Оркестарот од Филаделфија, Данскиот национален радио симфониски оркестар, Новата јапонска филхармониј и други. Тој е основач и организатор на меѓународниот фестивал „Медтнер“, организиран во чест на славниот композитор, а истовремено важи за еден од најдобрите современи интерпретатори на музиката на Николај Медтнер. Березовски настапува и како камерен музичар и соработува со светски познати уметнилки имиња, а има снимено и повеќе албуми со класична музика. Настапувал на многу светски познати фестивали, а „Охридско лето“ го смета за еден од најдобрите.

– Охридско лето ги има сите состојки за еден навистина успешен фестивал. Има добра и што е најважно разновидна програма од џез до класична музика и театар која ги задоволува вкусовите на сите посетители на овој град. Се одрржува на прекрасно место и на убави сцени. Сето тоа го прави еден од најспектакуларните фестивали воопшто.-изјави Борис Березовски.