Охриѓани кои пазарат на охридскиот зелен пазар, од вчера, имаат можност своите автомобили бесплатно да ги паркираат на улицата „Туристичка“, спроти градскиот пазар на просторот од аптека „Зегин“ до пешачкиот премин.
– Бесплатното паркирање е предвидено само за купувачите на пазарот во времетраење од 30 минути, а по надминување на времето од половина час ќе се наплаќа 20 денари по час. Бесплатното паркирање и минутажата ќе бидат контролирани од надлежни лица на јавните претпријатија „Билјанини Извори“ и „Градски пазар“, информираат од локалната самоуправа.
Целта на меѓусебната соработка на двете охридски претпријатија е да се влијае врз намалувањето на давачките кои ги имаат граѓаните, да се привлечат што поголем број купувачи, како и да се подобрат условите за пазарење на зелениот пазар.
OhridNews
