Репрезентацијата на БИХ не доаѓа во Скопје во февруарскиот термин на ФИФА одреден за пријателски натпревари. Од канцеларијата на ФФМ информираа дека се обидуваат да договорат средба со некогашната братска република, но на официјалната веб страна на Фудбалската Федерација на БИХ се вели дека на 9 февруари Џеко и компанијата ќе патуваат во САД каде на стадионот “Џорџија Доум“ во Атланта ќе одиграат пријателска средба со репрезентацијата на Мексико.
Македонија во моментов останува без спаринг партнер за овај термин кој е последен пред продолжувањето на квалификациите за ЕП 2012. Претходните два меча против Албанија (0-0) и Кина (0-1) селекторот Мирсад Јонуз ги искористи да им даде шанса на голем број дебитанти и фудбалери кои беа во втор план. Се очекува овај термин да биде искористен за прочистување на листата репрезентативци кои ќе ги бранат боите на Македонија во продолжувањето на квалификациите.
Македонија со четири освоени бода се наоѓа на петатта позиција на табелата. Пред “црвено-жолтите“ е двомеч со селекцијата на Р. Ирска по кој многу работи околу нашите можности за пласман на континеталниот собир ќе бидат појасни.
М.П.
