Министерот за транспорт и врски Благој Бочварски, заменик министерот Беким Реџепи и директорот на ЈП за државни патишта Ејуп Рустеми, денеска извршија увид на реконструираната делница од Подмоље до Охрид. Од денеска согласно времениот режим, делницата ќе биде вратена за сообраќај, а со тоа граѓаните и туристите повторно ќе можат да го користат за сообраќај овој дел од влезот во Охрид.
Делницата Подмоље – Охрид, како дел од автопатската делница Кичево -Охрид, согласно времениот режим беше затворена за сообраќај поради градежни активности на изградба на клучка Охрид, на изградба на бетонски мостови, земјени и асфалтерски работи на овој дел од трасата и требаше да биде пуштена до 10 јули, а сообраќајот беше пренасочен преку регионалниот пат Охрид -Подмоље.
Силниот ангажман на тимот од Министерството за транспорт и врски, Јавното претпријатие за државни патишта во соработка со МВР и други институции, како и изведувачот и надзорниот орган, се подвлекува во денешното соопштение од Министерство за транспорт и врски, придонело градежните активности на овој дел од патниот правец да бидат завршени и пред зададениот рок, се со цел сообраќајот да се врати во првобитниот режим и да се обезбеди нормализирање на туристичката сезона.
Пред извесно време бевме тука заедно со директорот и ветивме дека ќе ги завршиме градежните работи на овој дел од влезот во Охрид. Денеска сме тука и пред рокот што го најавивме за да се уверуме дека активностите се завршени. Од денеска повторно ќе ја вратиме во режим на времен сообраќај делницата од Подмоље до Охрид и ќе овозможиме сообраќајот да се одвива по главната траса. Ветивме дека се што правиме е во насока на создавање на подобри услови за туристичката сезона, така ќе продолжиме и во наредниот период., истакнал министерот Бочварски.
Како што се додава во соопштението, директорот на ЈП за државни патишта Ејуп Рустеми, нагласил дека се направени силни напори со сите институции и изведувачи делницата на главната траса да ја стават во функција.
Од денеска сообраќајот од Подмоље до Охрид се одвива повторно по главната траса, потенцирал, а ние, како што рекол, со исто силно темпо продолжуваме да работиме и на другите позиции на автопатската делница Кичево – Охрид.
СВР Охрид претходно информираше дека со пуштањето на делницата од Охрид до Подмоље престанува да важи задолжителниот времен режим за сообраќај и задолжителното пренасочување на сообраќајот по стариот пат Охрид-Струга.
Апелираме до возачите на внимателно управување со своите моторни возила и прилагодување на брзината спрема состојбите и условите на патот, велат од СВР Охрид.
OhridNews
