Постапувајќи по предлог на ОЈО за организиран криминал и корупција за определување мерка притвор, пред судија на претходна постапка при Основниот суд Скопје 1 во текот на вчерашниот ден беа спроведени 24 лица. Како што соопшти судот, по нивно произнесување во однос на предлогот на обвинителството, донесени се решенија со кои на М.Ч., О.П., И.Д., М.П., О.Р., Г.А., В.Т., Д.Л., И.Ц., Б.И., Ј.Ч., И.С., и В.М. судијата на претходна постапка го прифати предлогот и им определи мерка притвор во траење од 30 дена, додека на С.М., Г.Ѓ., М.П., Е.Д.Б., Б.Д., В.Ј, им определи мерка куќен притвор, пренесува „Макфакс“.
Против овие неправосилни решенија, странките имаат право на жалба до Кривичниот совет на овој суд во рок од 24 часа по приемот на решенијата.
За лицата кои се опфатени во предлогот, а во моментот извршуваат функција пратеник во Собрание на Р.М., судијата на претходна постапка ќе пристапи кон одлучување по предлогот на обвинителството откако ќе биде одлучено по барањето на судот испратено до претседателот на Собранието на РМ, додека за другите лица кои се опфатени во предлогот, а не беа спроведени пред судијата на претходна постапка, судот сè уште нема добиено известие за причините поради кои не е постапено по наредбите за нивно приведување, соопшти Основниот суд Скопје 1.
OhridNews
извор: „Макфакс“
