Поранешниот вицепремиер и министер за евроинтеграции, а од неаодамна нов член на Либералдемократската партија, Ивица Боцески, викендов од Охрид каде неговата партија работеше на изборната програма, упати критики до државните власти дека ги чуваат во тајност деталите од разговорите околу името. ЛДП побара итна лидерска средба на која ќе се разговара за разликите окoлу името.
– Поминаа неколку дена од посетата на медијаторот Метју Нимиц, а македонската јавност се уште нема ни најосновни и најелементарни информации и детали од посетата. Затоа ЛДП го повторува својот повик до премиерот Груевски и претседателот Иванов и бара итно да биде свикана лидерска средба. Македонската јавност не смее да биде третирана инфантилно, а прашањето за разликата со името не е приватна работа ниту на Груевски ниту на Иванов, ниту пак на ВМРО ДПМНЕ. Имајќи предвид дека ова прашање стои помеѓу Р. Македонија и реализирањето на нејзините стратешки определби – влезот во ЕУ и НАТО, македонските граѓани мора да бидат информирани која е стратегијата на државниот врв, дали има стратегија на државниот врв, што ќе се случува до 30-јуни и кој ќе ја понесе одговорноста, ако Македонија се соочи со уште еден бродолом во јуни. Веќе сме на половина од шпанското претседателство, а не го гледаме ни интересот, ни конкретната работа, а што е најтрагично ни грижата за европската перспектива на Македонија.-рече Боцески.
