Првиот претседател Киро Глигоров упати честитка до граѓаните на Македонија по повод Денот на независноста, 8 Септември. Глигоров во честитката пишува дека одржаниот референдум пред 20 години значеше врв на борбите и стремежот на македонскиот народ за слобода и сопствена држава.
Иако меѓу последните на Балканот, како што пишува Глигоров, тоа македонскиот народ го направи длабоко свесен за сопствените права и идентитет.
– Огромно е задоволството што 20-годишниот јубилеј го чествуваме во слободна и суверена држава, национална држава на македонскиот народ и татковина на сите припадници на другите етнички заедници што живеат во државава, членка на ООН и рамноправен субјект во меѓународната заедница. Без оглед на величината и богатството, без оглед на тоа како е прифатена, дали е напаѓана или оспорувана, Република Македонија ни е една и единствена татковина. Таа е географски одредена со нејзините меѓународно признати граници. Ние немаме друга татковина. Затоа мораме да ја чуваме, да ја градиме и да се бориме за неа. Притоа е важно сите граѓани на Република Македонија еднакво да ја сакаат државата и да ја чувствуваат како своја татковина. Тоа е важна претпоставка за меѓусебно разбирање, дијалог и соработка, за меѓусебно почитување, толеранција и соживот. Таквите определби се традиционални на овие простори и се содржани како во Крушевскиот манифест, така и во асномските документи.Уште еднаш од сè срце сакам да ви го честитам Денот на независноста на Република Македонија и да ви посакам добро здравје, семејна благосостојба и подобар живот“, се вели во честитката на првиот претседател Глигоров.
Ohridnews
