Со хуманитарен концерт, што ќе се одржи вечерва во Големата сала на општина Охрид, во 19ч., лајанс клубот „Лихнидос“ од Охрид, ќе одбележи четири години од постоењето.
На концертот ќе настапат уметници од Рим – Италија, членови на лајанистичкото движење, со чија помош лавовите од „Лихнидос“ во изминатиот период реализираа значајни хуманитарни проекти.
Во изминатите 4 години, преку низа хуманитарни активности, членовите – волонтери на ЛК „Лихнидос“ дадоа голем придонес во заедницата, помагајќи им на социјално загрозените, изнемоштените и болните, на лицата со пречки во развојот, на ранливите категории граѓани. Исто така, клубот несебично реализираше и проекти за помош на талентирани уметници, едуцираше граѓани и го промовираше Охрид како град во кој живеат луѓе со висока свест и општествена одговорност.
ЛК „Лихнидос“ беше еден од носителите на проектот „Декември – Месец на отворено срце“, преку кој заедно со иницијаторите и другите помагатели беа обезбедени средства со кои беше извршена набавка на специјално возило за лицата со посебни потреби од општина Охрид.
На свеченоста по повод 4-от роденден на ЛК „Лихнидос“, најавено е присуство на ракодството на националната асоцијација на лајанс клубови – Дистрикт 132 Македонија, гости од сродните клубови, лица од јавниот живот и секако хумани граѓани.
