Ве повикувам на смела и итна акција за туристичка одржлива трансформација. На светскиот ден на туризмот, 27 септември 2025. Антониот Гутереш, Генерален секретан на ООН.

Светскиот ден на туризмот е само повод, да апелираме, потсетиме и иницираме за тоа што треба да го правиме секој ден. Барем ние, во најтуристичкиот град во Македонија, препознаен и признат од многубројни, пребирливи светски патници. Крајно време е да се приклучиме кон светскиот тренд за одржлив развој на туризмот, чии хоризонти се проширени со одговорниот и регенеративен туризам, со цел не само да ги заштитиме, туку и да ги подобриме природните и културно-историски вредности на Охрид, што како светско наследство е базата што создава туризам и привлекува туристи. Бидејќи, во она со што се гордееле нашите предци, треба во иднина да уживаат уште многу генерации туристи, и од она што со векови давало живот околу Охридското Езеро, треба да живеат и новите генерации во годините пред нас. Да се издигнеме над предизвикот да грабнеме што е можно повеќе денес од туризмот, па макар утре и да нема туризам, но кој мисли на утре.

Ние сме тие кои сме одговорни за градењето иднина, да му вдахнеме одржливост на охридскиот туризам. Како? Со одговорен пристап и одговорно однесување на сите чинители вклучени во туризмот, но и на целата јавност, да придонесеме за чиста и здрава животна средина, за незагадено Охридско Езеро, за зачувување на неговиот биодиверзитет и еко баланс, за насочување кон зелениот туризам и обновливите извори на енергија, но и кон афирмација и поддршка на локалните бизниси и занаети, домашните земјоделски производи и храна, домашните уметници, нашата култура, историја, традиција, обичаи.

Со поддршка на локалната заедница, со заштита и подобрување на атрактивните ресурси, го поддржуваме одржливиот развој на туризмот и сме насочени кон создавање на подобро место за живеење на месното население и подобро место за посета на туристите. Вака е дефиниран одговорниот туризам на светскиот самит за одржлив развој во Кејп Таун, 2002 година, потоа прифатено на светскиот туристички саем во 2007 година. Одговорниот туризам бара од тур операторите, хотелиерите, владите, локалното население и туристите, да преземат одговорност и активности, за да го направат туризмот поодржлив.

Тоа значи, дека со развиен систем на одговорен менаџмент и одговорни активности на сите чинители на туристичката понуда на Охрид, на институциите на локално и национално ниво, жителите на Охрид и туристите, може да изградиме одговорен туризам, како суштински, клучен фактор и двигател за обезбедување одржлив развој на туризмот.

Сите елементи се поврзани кон иста цел, од што благодет и корист ќе имаме сите. Токму затоа, потребно е со поголема едукација, афирмација и информираност, да ù се доближат на јавноста придобивките од одговорниот туризам и сите заедно да се сплотиме во заложбата Охрид да го направиме место за поквалитетно живеење на населението и подобро место за уживање на туристите!

Охрид заслужува да ја прифатиме подадената рака за акција и реализација на годинешното мото на светскиот ден на туризмот „Туризам и одржлива трасформација“, и охридскиот туризам да добие ново, поодржливо руво, како дел од глобалниот туризам.

м-р Нина Кепеска
Докторантка на Факултет за туризам и угостителство Охрид, на тема одговорен туризам и одржлив развој на туризмот во Охрид