Се подинамичниот начин на живот ги натера луѓето, традиционалната трпеза да ја заменат со брзата храна или со готовите прехранбени производи. Овој брзорастечки тренд кој зема се поголем замав во европските земји, не ги одмина ниту граѓаните во државава. Генерациите кои доаѓаат не се ниту запознаени со македонската традиционална кујна, а „запршката“  е веќе одамна заборавена. Иако мислењата на експертите и граѓаните се поделени околу „запршката“, докторите во изминатиов период апелираат да се избегнува овој додаток во приготвената храна.

Сепак, охридските домаќинки од постарата генерација не кријат дека во приготвувањето на домашните манџи, како додаток ја вклучуваат и запршката. „Најчесто ја користам класичната запршка, претежно во гравот. Научени сме на тој специфичен вкус што се добива токму од овој додаток. “ – вели баба Нада.

Други сметаат дека, иако докторите им препорачале да не го користат овој „ритуал“ во јадењата, неколку пати месечно нема да им наштети. „Неколку пати месечно варам леќа и грав. Без запршка јадењето не ми е по кеиф. Докторите велат да не ја користиме, но сепак еднаш неделно нема да ни пречи. Читаме по весници дека оваа работа не е добра за здравјето, но што е со јајцата и пиперките кои се пржат во големи количини на масло. За хамбургерите и помфритот немам ниту коментар“ –  вели тетка Стојанка.

Докторите и дел од експертите сугерираат да се избегнува ставање на пржено масло во веќе сварена храна. Според нив, запрженото масло е штетно за организмот, а наместо тоа за згуснување на јадењата подобро е да се користи зеленчук. Исто така, проблеми можат да се јават и во системот за варење на храната проследени со тешкотии и тегоби во стомакот.

Инаку, традиционалната запршка претставува запржување на брашно и црвен пипер во масло, како додаток за згуснување и вкус во манџите.

O.T