Станува збор за проектот Добротољубие, кој е резултат на соработката помеѓу католичката и православната црква, а е финансиски подржан од германско здружение кое финансира проекти од ваков вид во повеќе земји во регионот.
– Тука децата се згрижени без разлика на нивната возраст или болест. Поминуваат по неколку часови дневно, од 8 часот наутро до 13 часот. Се дружат меѓусебе, разговараат, играат игри на компјутер, онака како што тие сакаат и без некаков притисок од наша страна , објаснува дипломираниот психолог Марија Кочовска, која се грижи за децата.
Таа додава дека дневниот престој има големо значење за самите деца, но и нивните родители, затоа што родителите воопшто не се изложени на било каков трошок околу оброците за храна и превозот.
– Децата имаат голема потреба да се дружат и затоа кај нив се јавува страв дека проектот може да престане поради недостиг од средства. Засега финансиски средства има до мај годинава, а од наша страна се прават обиди тој да продолжи, вели Кочовска.
Децата кои го посетуваат Дневниот престој во црквата Св. Ѓорѓија неодамна беа посетени и од страна на градоначалникот Александар Петрески, кој при тоа потенцира дека локалната самоуправа ќе продолжи со поддршката на оваа ранлива категорија деца.
– Иако тоа не беше во наша надлежност, успеавме да отвориме во секое училиште простории за децата со посебни потреби. И во наредниот период ќе продолжиме да инвестираме со цел во што поголема мера да ги задоволиме нивните барања, рече градоначалникот Александар Петрески.
