Директорот на рускиот театар „Вера Комисаржевскаја“ доби признание од Македонија

За особен придонес во унапредувањето на македонско-руските културни врски Министерката за култура Елизабета Канческа – Милевска денеска на уметничкиот директор на престижниот руски државен академски драмски театар „Вера Фјодоровна Комисаржевскаја“ од Санкт Петербург, Виктор Новиков, му го врачи специјалното признание „Пријател на Македонија“.

Министерката Канческа Милевска рече дека признанието претставува чин на искрена благодарност до Новиков и театарот од Санкт Петерсбург за сето она што го имаат направено во текот на изминатите години во насока на продлабочувањето на соработката во областа на театарската уметност, но воедно и пријателството меѓу двете земји.

-Јас искрено се надевам дека ова призние ќе придонесе за продолжување и продлабочување на културната и меѓународна соработка помеѓу Македонија и Русија, рече Канческа Милевска.

Во рамки на доделувањето на признанието, Новиков  меѓудругото рече дека е многу задоволен од досегашната соработка со фестивалот Охридско лето, македонските актери и режисери и изрази надеж дека оваа соработка и понатаму ќе се продлабочува.