Годинашниот лауреат на Струшките вечери на поезијата, јужноафриканецот Монгани Вали Сероте, вечерва го доби златниот лавров венец. Ова највисоко признание на фестивалот му го врачи претседателот на Управниот СВП Славе Ѓорго Димоски.
Сероте е 47-тиот добитник на наградата. Филигранскиот венец првпат е доделен во 1966 на рускиот поет Роберт Рождественски за најдобра песна, а од 1971 година, кога лауреат бил американскиот поет Вистан Хју Одн, Златниот венец се доделува за творештво.
На меѓународниот поетски митинг „Мостови“, што традиционално се одржува на Мостот на поезијата во Струга, се доделуваат и наградите „Браќа Миладиновци”, „Мостови на Струга“ и „Иселеничка грамота“.
На 51. издание на Струшките вечери на поезијата што почна во четвртокот, а завршува на 28-ми овој месец, учествуваат 60-тина домашни и исто толку странски поети од Азербејџан, Шпанија, Франција, Индија, Куба, Ирак, Сирија, Мароко…
Изминатите денови во рамки на фестивалот беа промовирани повеќе изданија, се одржаа „Ноќи без интерпукција“, а беше претставено и творештвото на лауреатот Сероте.
Манифестацијата продолжува утре и задутре со шетање на учесниците низ повеќе градови во државата, а ќе биде заокружена во вторник со прогласување на Сероте за почесен член на Друштвото на писатели во Скопје.
