Централниот одбор на ДОМ ја потврди одлуката на Извршниот одбор за самостоен настап на локалните избори. Претседателката на партијата Лилјана Поповска рече дека ДОМ ќе има околу 40 советнички листи, но ќе ги поддржи кандидатите за градоначалници од коалицијата предводена од ВМРО-ДПМНЕ.
Носител на поднесената советничка листа на ДОМ во Охрид е Лета Филипова, која најавува подобрување на туристичката инфраструктура ,современи автобуски постојки,изградба на паркови и фонтани на повеќе локации во охридски стил.
– Програмата на зелената опција има за цел приближување до Европските зелени партии. На граѓаните на Македонија и на Охрид , ќе им понудиме ЗЕЛЕНА програма базирана на „Платформата за зелени општини“ која ДОМ ја претстави пред една година. Приоритетни се 9 (девет) столбови: Демократија и човекови права; Ефикасна заштита на животната средина; Зелена економија со зелени работни места; Еко-земјоделие; Еко-туризам; Обновливи енергии и енергетска ефикасност; Зелени градови; Социјална правда и еднакви можности; Образование, наука и култура, вели Филипова која додава дека кандидатите за советници се интелектуалци од различни области и млади луѓе кои ќе придонесат за подобар Охрид.
