ЗРСК Пастрмка – Струга, вчера, изврши порибување на риболовен ревир на реката Црн Дрим со подмладок на автохтона охридска пастрмка. Во водите на Дрим беа пуштени околу 4000 единки пастрмка, обезбедени од мрестилиштето во село Шум, Струшко кое е во склоп на Институтот за сточарство од Скопје.
– Ова порибување за нас како концесионери претставува исполнување на законската обврска преземена со потпишување на концесискиот договор за стопанисување со рибите во риболовен ревир „река Црн Дрим 1“, но од друга страна, за нас како рекреативни и спортски риболовци, претставува празник на душата затоа што нашиот риболовен ревир го збогатуваме со благородна риба. Со ова, а и со претходните и наредните порибувања, се надеваме дека ќе успееме да го вратиме стариот сјај на реката Црн Дрим, која по многумина е една од најубавите во Републикава – изјави Емил Матовски, претседател на концесионерот на риболовен ревир „река Црн Дрим 1“ – ЗРСК Пастрмка од Струга.
Порибувањето се одвиваше под надзор на Државниот инспекторат за земјоделство од областа на рибарството и аквакултурата и во соработка со Институтот за сточарство – Скопје.
OhridNews
