И четврти ден патничките бродови „Галеб“, „Кристина“, Александрија“ и „Македонија“ нема да испловат од пристаништето поради забраната што им ја изрече Капетанијата, бидејќи немаат извршено технички преглед. Бродарите се револтирани од ваквата одлука, поради која, како што тврдат, тие трпат сериозни загуби, за што најавија дека ќе побараат државата да ги обесштети. Откако не успеаа преговорите со Капетанијата, тие вчера за помош се обратија до Советот на општината, кој иако нема надлежност за решавање на случајот, усвои заклучок за надминување на проблемот.
– Советот на општина Охрид апелира до сите релевантни и стручни лица во Министерството за транспорт и врски, со оглед на фактот што туристичката сезона е во полн ек, до крајот на оваа работна седмица (23.07.2010.) да изнајдат соодветен и прифатлив начин за решавање на горливиот проблем настанат со изречената забрана за пловење на бродовите по Охридското Езеро. Апелираме да ја сфатите сериозноста од сите несакани последици кои би можеле да произлезат од ненавремено, несоодветно и неадекватно решавање и импровизација на ова прашање. Советот на општина Охрид со сиот свој потенцијал, заедно со Капетанијата на пристаништата во Р.М., Министерството за транспорт и врски, Здружението на бродари и екипажи во бродовите како и други експерти од областа на внатрешната пловидба, стои на располагање за преземање на брза, ефикасна и издржана заедничка и координирана активност во овој поглед.- се вели во заклучокот што вчера го усвои Советот.

Реагираше советничката група на  ВМРО ДПМНЕ, која смета дека случајот не смее да се политизира. Оттаму информираат дека иницирале средба помеѓу претставници на Здружението на бродари и Министерството за транспорт и врски кое е единствено надлежно за  решавање на проблемот.

– Советот нема надлежности во оваа сфера. Затоа, веднаш и директно исконтактиравме со Министерот за транспорт и врски и излобиравме средба на преставниците на бродарите со министерот Јанакиевски која ќе се одржи денес во Скопје,  на која ќе се разговара за настанатата состојба. Според нашиот принцип на работа проблемите не се решаваат со политички игри и наводна загриженост преточена во заклучоци, туку со итно реагирање.-вели Дејан Пановски, координатор на советничката група на ВМРО ДПМНЕ.

Се огласи и Министерството за транспорт и врски кое ги повика сопствениците на бродови во Охридското езеро да ги почитуваат законските прописи и меѓународни норми.

– Најважна е безбедноста на патниците на пловните објекти во внатрешната пловидба во Република Македонија и оттука надлежните органи ќе ги преземаат сите законски мерки за спроведување на меѓународно пропишаните технички стандарди, се вели во соопштението од Министерството за транспорт.

Од Министерството објаснуваат  дека е потпишан договор со меѓународната групација „Биро Веритас“ која работи согласно пропишаните правилници од  Меѓународната асоцијација за класификација на стандарди, како и согласно Европската Директива 2006/ЕС, врз основа на кои се утврдуваат и цените на надоместокот за технички преглед и регистрација на бродовите.

– Преглед на цртежот на конструкцијата на бродот, основен преглед на инсталација на машините, основен преглед на електричните инсталации, како и основен преглед на сигурносните опрема и инсталации изнесуваат по 700 евра, а проверка на стабилноста и оштетената состојба 2.800 евра. Овие надоместоци од страна на сопствениците на пловни објекти се подмируваат еднаш, со цел добивање на соодветната техничка документација за пловните објекти, а потоа се врши услуга за иницијален преглед на бродот, односно за обновување на сертификатот која  изнесува 1.000 евра и услуга за средишен преглед на бродот која изнесува 675 евра во класификационен период од 3 години, се вели во соопштението.

Реагираат и туристичките агенции кои укажуваат дека трпат штети, затоа што не можат да ги реализираат планираните прошетки по езерото за кои туристите платиле во аранжманите. Според нив забраната за пловидба на бродовите негативно ќе се одрази на имиџот на Охрид, поради што апелираат до надлежните институции и Здружението на бродари да изнајдат решение за проблемот.

Г. Момироски