Екстерните испити од државната матура во јунскиот испитен рок за
учениците од гимназиско, средно уметничко и средно стручно образование
ќе се одржат на 9 и 12 јуни.

Вкупниот број на пријавени кандидати по верификацијата на Државниот
испитен центар по поднесените пријави од страна на средните училишта
изнесува 18.941 ученик. Од нив 12.736 за македонски јазик и литература,
5.791 за албански јазик и литература и 411 за турски јазик и литература.

Изборниот предмет ќе се спроведе на 12 јуни (вторник) 2012 година. За
изборниот предмет од екстерниот дел на државната матура пријавени се
16.751 кандидат за странски јазик, 2.208 – математика, 62 за естетика и
24 кандидати за филозофија.

Испитите во целата држава се организирани согласно пропишаните правила и
процедури. Во нивната реализација се вклучени членовите на училишните
матурски комисии, обучени тестатори, како и овластени набљудувачи кои ќе
го следат процесот на спроведување на тестирањето.

Прелиминарните резултати од екстерните испити од јунскиот испитен рок на
државната матура ќе бидат објавени најдоцна до 12 јули 2012 година,
 при што кандидатите кои сметаат дека не се правилно вреднувани ќе имаат
право на приговор.

Секој кандидат за сопствените резултати ќе може да се информира и на веб страната www.matura.gov.mk.