Интерес за обележување на водна површина на Охридското Езеро каде ќе слетуваат хидроавиони пројавила една компанија. Таа ги доставила потребните документи до Министерството за транспорт и врски, кое неодамна го промовираше правилникот за обележување писта во водите на Охридското Езеро.
-Има една компанија која е заинтересирана. Екипа од повеќе институции работи на разгледување на таа понуда, а во наредниот период ќе оствариме и средба со таа компанија. Ние внимаваме да се запази законската процедура, но пред се да се запазат еколошките стандарди, за што е вклучено и Министерството за животна средина, а ќе се консултираме и со релевантни светски институции, затоа што Охридското Езеро е заштитено од УНЕСКО и мора да има високи еколошки стандарди. Доколку има и најмало негативно влијание на Охридското Езеро, ние нема да продолжиме со процедурата, но знаеме дека со воспоставување на добра правна рамка и вклучување на голем број експерти нема да се загрози Охридското Езеро.-изјави денеска министерсот за транспорт и врски Миле Јанакиески. Тој посочи дека за иницијативата ќе бидат направени консултации и со концесионерот на аеродромите во Македонија, турската компанија ТАВ, бидејќи од договорот за концесионирање произлегувала таква обврска.
Јанакиески уште еднаш подвлече дека во Охридското Езеро нема да се гради никаков аеродром од цврсти материјали и дека тоа се злонамерни шпекулации за дневнополитичка употреба.
