Коалицијата граѓански еколошки организации кои учествуваа на локалните избори со своја советничка листа но не освоија место во советот, денеска потпишаа меморандум за соработка и унапредување на граѓанското демократско општество на локално ниво и декраларација за стратешките еколошки и урбанистички цели со кандидатот за градоначалник од ВМРО-ДПМНЕ, Кирил Трендафилов – Нанче.
„Независно од декларираната политичка определба на кандидатите за градоначалник на Општина Охрид, за нас, заштита на животната средина и урбанистичкиот развој на Охрид се стратешките проблеми. Се обврзуваме дека вистински и професионално ќе се посветиме на целта“, велат екологистите.
Во декларацијата, тие и кандидатот за градоначалник Трендафилов-Нанче се обврзуваат да формираат независно стручно тело при советот на општината во делот за просторно и урбанистичко планирање, кое ќе влијае стручно, а не партиски.
Потписниците а декларацијата се обврзаа, при донесувањето на просторните, генералните и деталните урбанистички планови, да ги почитуваат прописите и стандардите пропишани од УНЕСКО и Европската Унија.
Доколку биде градоначалник, Кирил Трендафилов – Нанче, со денешниот документ се обврза дека ќе се залага за функционалност на колекторскиот систем, зачувување на студенчишкото блато, решавање на проблемот со варниците во селото Лескоец, регулација на Кослска и Велгошка Река и решавање на проблемите со депониите Буково и Мауцкер.
Доколку другиот кандидат за градоначалник ја поддржи програмата на екологитите, тие ќе потпишат меморандум за соработка и со него.
Ohridnews
