Факултети и универзитети од Србија ќе имаат можност да ги презентираат можностите, условите, стипендиите и другите бенефиции за студирање на македонските студенти на факултетите и универзитети во Р. Србија на Саемот за образование кој ќе се одржи во петок, 24 мај, во Општина Охрид.
Саем на образование е во организација на универзитетите и факултетите од Р. Србија во соработка со образовните институции во Македонија, амбасадата на Р. Македонија во Србија и Почесниот конзулат во Охрид, а поддржан и од Општина Охрид.
На Саемот ќе бидат презентирани сите програми од страна на реномирани професори, декани, предводени од Младен Шарчевиќ, поранешен министер за образование и советник на претседателот на Република Србија, Александар Вучиќ. Покрај програмите ќе бидат презентирани и сите бенефиции кои ќе ги нудат за нашите македонски студенти, како што се стипендиите, олеснувањата во многу начини на запишување на тие факултети и секако стручната спрема на високо образование која ја нудат на високо ниво. Ова е и еден темел на соработка во сферата на образованието која е многу битна за развој на нашиот регион и нашите две братски држави, вели почесниот конзул на Република Србија во Охрид, Михајло Филев.
Потенцира дека ќе бидат присутни претставници на повеќето факултети и универзитети од Ниш, Белград, Нови Сад, ќе бидат застапени и сите струки кои ги содржат српските универзитети, а ќе има и од приватните факултети кои ќе даваат свои бенефиции и олеснувања во плаќањето. Упати покана до сите потенцијални студенти да дојдат да се информираат.
Ќе има многу добри услови за соработка во сферата на образованието. Ова е двонасочна соработка и нашите факултети и универзитети ќе имаат можност да ги презентираат условите кои ги нудат за српските студенти. Отворени сме за соработка во двете насоки. Ќе има претставници и од нашите факултети и универзитети, ќе се разменат мислења, искуства и условите од двете страни, за да можат студентите понатаму да ги користат сите тие услуги и со тоа да се зголеми културната соработка, соработката во сферата на науката, што е еден темел да бидеме уште поцврста спрега зошто нашите корени се нераскинливи и хармонијата билатерална и сите односи се на највисоко ниво меѓу Македонија и Србија, потенцираше Филев.
Најави дека во иднина покрај соработката во сферата на образованието следат и други проекти во сите сфери во насока на сплотеност и соработка помеѓу народите во Србија и Македонија.
Н.С.Ј.
