-На полувремето додека нашите соиграчи од првиот тим беа во соблекувалните на пауза резервните играчи останавме на терен да се загреваме и тогаш група навивачи се симна од трибините и физички не нападна при што бевме удирани. Со физички и психички последици во вториот дел моравме да играме, а делегатот и полицијата не реагираа соодветно, изјави Јован Китрозоски, еден од нападнатите фудбалери на ФК Охрид.
Според директорот на ФК Охрид 2004, Илче Каланоски, полициското обезбедување било несоодветно, а во инцидентот настрадале и припадници на органот за ред и мир.
-На 6000 публика имаше само 10-15 полицајци кои не можеа да излезат на крај со навивачката група „Балисти“, а дел од полицајците беа и повредени во инцидентот. Ние отидовме во Тетово да играме фудбал, а не да се бркаме со навивачите, истакна Каланоски, кој запраша дали натпреварот по еден таков инцидент требало да продолжи.
Од ФК Охрид 2004 посочуваат дека е крајно време ФФМ да реагира и да стави крај на немилите сцени на стадионот во Тетово, кои како што велат од клубот често се повторуваат.
-Не е прв пат ваков инцидент да се случи во Тетово. Не дај боже нешто такво да се случи во Охрид, доживотно ќе бевме казнети и никогаш повеќе фудбал тука нема да се играше, но очигледно е дека се работи за два различни света, рече портпаролот на охридскиот прволигаш, Иван Арсеноски.
Натпреварот на кој се случил немилиот настан го доби Шкендија со 2:0.