Македонската политичка сцена стана побогата за уште една партија, со формирањето на Партија за Економски Промени (ПЕП) 21, која вчера го одржа основачкото собрание, пренесува „Макфакс“.
За претседател на новиот политички субјект е избрана Билјана Јовановска, која пред неколку години беше директор на Агенцијата за вработување. Таа беше член на ВМРО-НП и на Обединети за Македонија.
Според соопштението, политичката партија ПЕП 21 ќе делува конструктивно, одговорно, благовремено заземајќи политички ставови, за сите значајни прашања од политичкиот и воопшто јавниот живот, а кои се во интерес на Република Македонија и нејзините граѓани.
„Ова е самостојна, доброволна, демократска, граѓанска партија, отворена за сите оние кои сакаат да пристапат во неа и сакаат да дадат свој придонес преку свои проекти, програми, идеи, ставови и мислења. Економските прашања, односно заложбите и преземањето на активности за позитивни промени во економијата е приоритет во програмската платформа и политика на Партија за Економски Промени 21“, се наведува во партиското соопштение.
Од новата партија истакнуваат дека ќе се залагаат за фер и пазарно модерна економија, која ќе тежнее кон што поголема вработеност и повисоки плати, а нивните делувања ќе бидат насочени проекти и мерки со кои државата ќе овозможи целосна поддршка на реалниот сектор кој би создал услови привлечни и прифатливи за вработување.
Основачи на Партијата за Економски Промени 21 се граѓани коишто се познати и успешни во своето поле на работење, делување и живеење, но кои досега не биле политички јавно експонирани.
извор:„Макфакс“
