Љубителите на пивото и скарата четири дена ќе уживаат во забавата на охридскиот Пиво фест што по втор пат се одржува на спортскиот центар „Атина Бојаџи“ во Охрид. Пиво фестот беше отворен синоќа со концерт на „Партибрејкерс“, а публиката уште ќе ги види и „Поздрав Азри“, „Рибља чорба“, Тони Зен, „Суперхикс“, блех оркестарот „Черкези“,  српската фолк ѕвезда Сека Алексиќ и други.


На околу 8000 метри квадратни простор своите „марки“ ќе ги понудат познати производители на пиво од земјава и странство, а организаторот очекува настанот да го проследат околу 120.000 посетители.


-Охридскиот Пиво фест не е комерцијален настан. Тој е можност за промоција сите брендови на пиво во Македонија да ги претстават своите производи по пониски цени, а сето тоа ќе биде проследено со извонредна богата музичка понуда, изјави Даниел Димитровски, од „Герила маркет“ – организатор на фестивалот.


Димитровски смета дека врвот на туристичкиот шпиц, кој вообичаено е околу Илинден, е најдобриот термин за одржување на Пиво фестот во Охрид, иако во јавноста преовладува и мислење дека ваквите манифестации треба да се одржуваат на почетокот или крајот на летото, со цел да се продолжи сезоната.

-Овој настан треба да биде во ек на сезоната, бидејќи не знам дали воопшто е возможно сите учесници да партиципираат во нешто каде нема туристи, односно голема публика, истакна Димитровски.


Пиво фестот „Охрид 2011“ трае до 31-ви јули.

OhridNews
фото: Васко Бујароски