Фото: Со пригодна свеченост во новите простории на ООУ „Кочо Рацин“ означен почеток на учебната година

Со пригодна свеченост која се одржа во ООУ „Кочо Рацин“ беше означен почеток на новата учебна година за триесет и шест првачиња кои ќе ја следат наставата во новата училишна зграда во просториите на поранешната Касарна.

Присутните ученици, наставници, родители, пратеници во Собранието, претставници на локалната ги поздрави градоначалникот Кирил Пецаков кој посочи дека локалната самоуправа со новиот модерен, функционален и безбеден образовен објект покажа дека стои цврсто зад образованието како приоритет.

Сите вие сте една нова генерација која ќе испише нови приказни, големи успеси и ќе остави траен печат во образованието во Охрид. Во време кога светот се менува со невидена брзина токму вложувањето во овој сегмент од општественото живеење е најдоброто наследтсво што можеме да им го оставиме на нашите деца. Денес за првпат ќе седнете во училишната клупа, ќе ги запознаете своите први училишни другарчиња и ќе започнете едно убаво и весело патување низ бројките и буквите. Нека вашите чекори бидат сигурни, а вашите насмевки искрени, вашите срца отворени за училишни успеси. Нека е среќна и успешна новата учебна година во Охрид. Да славиме и да се радуваме заедно за големи училишни успеси, им посака градоначалникот на првачињата.

Добредојде во „вториот дом“ на првачињата им посака и директорката на училиштето Славица Котеска која посочи дека пред нив стои еден прекрасен свет на учење, каде буквите и броевите ќе се претворат во големи можности.

Тука во ова училиште ќе учите, ќе се смеете, ќе играте и ќе се дружите. Тука ќе учите како да бидете добри другари, како да помагате и да се грижите за другите. Но, најважно од се овде ќе учите како да верувате во себе и во своите способности. Ова е почеток на еден процес кој ќе ве води низ целиот ваш пат како ученици, но и како луѓе кои ќе бидат важни членови на општеството. Бидете храбри, бидете љубопитни и верувајте во себе, рече Котеска.

Потенцираше дека новата училишна зграда денес е исполнета со радост и возбудливи насмевки, а денот исполнет со надеж.

Нашето училиште секогаш ја чувствувало грижата и поддршката на општина Охрид. Со внимание и посветеност општината вложува во подобри услови за наставата, во создавање пријатна и безбедна средина за учениците и во охрабрување на младите да чекорат храбро кон иднината, додаде Котеска.

Во рамки на свеченост градоначалникот Пецаков на првачињата им подели и пригодни подароци, по што заедно со директорката на училиштето направи обиколка на просториите во училиштето. Беше изведена и едукативната театарска претстава „Во царството на другарството“ од страна на актерите од „Театар хит комедија“, Сашо Ристовски, Магдалена Ризова Черних и Ема Давчева, а присутните имаа можност да проследат и музичка точка подготвена од страна на учениците.

Вкупната инвестиција за новата училишна зграда на ООУ „Кочо Рацин“ изнесува околу 90 милиони денари, средства со кои се овозможи темелна реконструкција, адаптација и опремување на просторот.

Инаку, првиот училишен ден во основните училиште во Охрид го започнаа повеќе од 400 првачиња.