Голем број верници утрово го исполнија манастирскиот комплекс Свети Наум за празникот посветен на светецот за да се помолат за своето и за здравјето на нивните најблиски, бидејќи се верува дека Свети Наум Охридски имал чудесна моќ на излекување и дека бил голем исцелител.
На влезот од манастирската црква верниците трпеливо чекаа во ред за да запалат свеќа и да се поклонат на гробот на светителот. Беше отслужена Света Архиерејска Литургија на која чиноначалствуваше Неговото Високопреосвештенство Митрополитот на Дебарско – кичевската епархија г-дин Георгиј.
Дел од верниците до Св. Наум пристигнаа со бродовите „Александрија“ кои по повод празникот до светилиштето пловеа по симболична цена.
Св. Наум заедно со Св. Климент Охридски се ученици на славните светители Кирил и Методи. Свети Наум му беше најблизок соработник на божествениот Климент, а и на светите браќа Кирил и Методиј. Со последниве тој беше заедно во нивната мисија во Моравија. Потоа некое време престојуваше во престолнината на Бугарија, Плиска, а најпосле дојде да биде учител во охридско, во времето кога Климент стана епископ.
Св. Наум најголемиот дел од својот живот го поминал во манастирот на јужниот дел од Охридското Езеро кој сам го изградил. Таму тој ја развивал својата просветителска дејност. Освен по книжевната работа меѓу народот бил познат и како исцелител и за време на својот живот излечил многу луѓе претежно душевно болни.
Познат е и како чудотворец бидејки направил и многу чуда, а некои од неговите чуда се претставени и на фреските од неговиот манастир како таа на која е претставен Св. Наум кој ги впрегнал заедно волот и мечката да ораат.
Мирно се упокои во Господа, како монах, во 910 година. Тој до денес не престанува да чудотвори. Посебно е познат како исцелител на душевно болни. Затоа кај нас особено лекарите-психијатри го имаат за свој заштитник.
Н.С.Ј.
фото. Г. М.
