Во Лагадин денес во црквата посветена на Св. Маченички Софија, Љубов, Вера и Надеж традиционално беше одбележан празникот посветен на светите маченички.
На богослужбата што се одржа во малата истоимена црква присутвуваа голем број верници. Традицијата на овој ден е да се осветат празничната софра и вода, а граѓаните трпеливо во редици чекаа да запалат свеќа. Во Лагадин дојдоа и голем број охриѓани и охриѓанки кои ги носат имињата на маченичките.
Малата црква во Лагадин посветена на светите маченички Софија, Љубов, Вера и Надеж, во 2000 година ја изгради охриѓанецот Љупчо Патче, кој средствата кои се собираат во црквата на овој ден ги донира во хумани цели.
Во својот богослужбен циклус, Црквата на овој ден се сеќава на животот и мачеништвото на четири римјанки Вера, Надеж, Љубов и нивната мајка Софија. Овие четири христоподобни души беа приведени од римските власти за време на прогоните на императорот Хадријан, во првата половина на вториот век по Христа.
Заради исповедањето на Христа и одбивањето да принесат жртви пред празниот идол на Артемида, Вера, Надеж и Љубов беа ставени на маки пред очите на нивната мајка и најпосле им беа отсечени главите. Софија ги зеде и ги закопа телата на своите три ќерки и откако помина три дена и ноќи во молитва над нивниот гроб, го предаде својот дух на Бога.
Во Лагадин одбележан празникот Св. Маченички Софија, Љубов, Вера и Надеж
Н.С.Ј.
фото. Г.М
