Фото: Животната средина и урбаното живеење во Охрид низ делата на меѓународни уметници

Групна изложба посветена на животната средина и урбаното живеење во Охрид беше отворена вчеравечер во Центарот за култура „Григор Прличев“ во рамки на проектот ПРОСПЕР.

Осуммина меѓународни уметници престојуваа во Охрид во април 2024 година како дел од проектот ПРОСПЕР: ПРОтотип за одржливи резиденции на ПЕРиферии. За време на престојот тие се сплотија со околината и остварија интеракција со природата и со урбаното опкружување околу Езерото.

Идејата беше да се инспирираат уметниците да пронајдат врски помеѓу нивната авторска практика и кревката околина на Охридското Езеро и неговите жители. Уметниците се изразија преку создавање: фотографии, скулптури, композиции, поеми и интервенции на пронајдени предмети. Траги од нивното креативно истражување беа изложени во рамките на групната изложба.

На изложбата можеa да се видат делата на: Јара Асмар (Yara Asmar), Клаудио Беоркија (Claudio Beorchia), Јулија Ехлер (Julia Eichler), Кафар Рзаев (Qafar Rzayev), а изведено беше и перформативно поетско читање на Ката Ѓорфи (Kata Győrﬁ).

Дел од уметниците твореа на јавни површини на самото Езеро и во неговата околина. Муралите на Марија Видовиќ (Marija Vidović) може да се видат на повеќе локации во Охрид, а медитативното звучно доживување на вода на The New Liquidity Андерс Ехлин (Anders Ehlin) и Селма Бошкаило (Selma Boskailo) се случува на Езерото.

Проектот ПРОСПЕР го реализираат 5 организа- ции: Перипетија Продукција и ЛДА Струга (С.Македонија), ЛУП (Грција), Ехо анимато (Србија) и Ојун (Германија).