Синоќа, пред голем број официјални личности од културниот и политичкиот живот на Париз, Градоначалникот на Охрид Никола Бакрачески, со пригодно обраќање на тема “Охрид-кандидат за Европска престолнина на културата за 2020”, го претстави Охрид со своите културни, духовни и историски посебности.

-Да се опише Охрид, значи да се тргне превезот на долгата историја која датира над 7000 години наназад во периодот на неолитот, да се прочитаат артефактите на 250 археолошки наоѓалишта во градот и околината и да се следи патот на христијанството од овде од Охрид на исток до Киевска Русија и до западот на Европската цивилизација.-истакна Градоначалникот Бакрачески.
Во обраќање тој посочи дека Охрид е светилникот на македонската и европската историја, духовност и култура, изворот од кој се напиле многумина, жедни за духовни и културни сокови. 

-Митската местоположба на градот и на бисерното Охридско езеро од дамнина е предодредена да биде центар на научната и книжевна дејност во овој дел од Балканот, за понатака да го шири своето научно и културно влијание на словенските земји во Европа. Свети Климентовата дејност го воздигнува градот како водечки книжевен, културен и духовен центар на словенската писменост во ИЏ век, преку формирањето на првиот Словенски Универзитет низ кој 3500 ученици ги развиваат духовните и научните способности. Нивните книжевни оддеци се пренесуваа до најоддалечените простори на словенските народи, приближувајќи го христијанското слово до безбожните и до неуките.-рече Бакрачески.



Опишувајќи го градот во сегашниот момент и неговото значење за Република Македонија и воопшто за светските цивилизациски вредности, градоначалникот Бакрачески истакна дека денес Охрид е спој на традицијата и современото, главен духовен, културен и туристички центар на Република Македонија и  простор под заштита на УНЕСКО, како културна, а со Охридското езерои како природна реткост. „Повеќе од стотина цркви кои се наоѓаат во градот и неговата непосредна околина зборуваат за традицијата и посветеноста на македонскиот народ. Така ние македонците ја почитуваме традицијата, ја градиме сегашноста и ја планираме иднината, сврзувајќи ги сите вредности во една целост која ја почуствувале оние што барем еднаш го посетиле Охрид“, додаде Бакрачески на претставувањето на Охрид кое предизвика голем интерес и прием кај присутните. 

Во текот на вчерашниот ден и синоќа, градоначалникот Бакрачески оствари средби со повеќе официјални гости на Фестивалот, меѓу кои со Генералниот директор на УНЕСКО, Ирина Бокова, амбасадорите на Р. Црна Гора, на Р.Албанија и Р. Хрватска во Франција, со повеќе личности од културниот живот на Париз, како и со проф.Јордан Плевнеш и други македонски еминентни културни имиња од светот на музиката и филмската уметност кои се наоѓаат во Париз, информираат од локалната самоуправа.
OhridNews