– Покрај езера и реки градби се забранети. Тоа се зони кои му припаѓаат на народот и треба да бидат ослободени од градба. Кога се гради нешто длабоко се повлекува од таква зона и се прави голема грешка доколку се гради на брегот на Охридското Езеро, смета архитектот Георги Константиновски.
Претседателката на Асоцијацијата на архитекти на Македонија, Даница Павловска, лично смета дека растот на Охрид можеби не е контролиран, но за да се донесе било каков заклучок, според неа, треба соодветно, длабински и многу внимателно да се анализира целата состојба. Таа посочува дека тоа што се случува во Охрид и во Скопје посебно, бара професионална дискусија која ќе продуцира посоодветни урбанистички решенија, до кои не може да се дојде без јавна расправа.
-Она што недостаува во урбанистичките процеси е јавната расправа и презентација и тој јавен дијалог не само со стручната туку и со општата јавност. Меѓутоа тоа нешто се регулира со закон. Онака како што е регулирано не е квалитетно решение, може да се изготви ново и ние стоиме зад таквите предлози, изјави Павловска.
Архитектите сметаат дека Охрид како жив град треба да се развива и гради и да се внесуваат модерни детаљи, но тоа мора да биде внимателно осмислено за да не се наруши амбиентот кој го создаваат препознатливата охридска архитектура, културно историските споменици и природните убавини, поради кои градот и Охридското Езеро пред повеќе од три децении беа прогласени за светско наследство заштитено од УНЕСКО.
